Прэзыдэнт Украіны Ўладзімір Зяленскі заявіў, адкрываючы Мюнхэнскую канфэрэнцыю па бясьпецы, што затрымка перадачы Ўкраіне вайсковай тэхнікі і ўзбраеньня дазволіць Расеі аднавіць яе патэнцыял для дэстабілізацыі сытуацыі ў іншых рэгіёнах сьвету.
«Галіят шанцаў ня мае, але ён мае патэнцыял і спрабуе набыць дадатковы час, таргуючыся са сьветам. Ён хоча зьнішчыць шмат жыцьцяў, таму нам трэба пасьпяшацца. Нам патрэбная хуткасьць [рэалізацыі] нашых дамоўленасьцяў аб пастаўках, каб абмежаваць расейскі патэнцыял», — заявіў Уладзімір Зяленскі, выступаючы на Мюнхэнскай канфэрэнцыі па бясьпецы.
Паводле яго, зацягваньне заўсёды было памылкай:
«Пакуль мы вядзем перамовы, як узмацніць сваю абарону сучаснымі танкамі, Крэмль думае, як задушыць сучасную Малдову. Калі мы пераконваем, што Ўкраіне патрэбна сучасная баявая авіяцыя, Расея ўжо пераканала іранскі рэжым, і вынікам сталі ня толькі іранскія дроны ва ўкраінскім небе, а яшчэ нешта, чым Крэмль за гэта заплаціў. Вы ўпэўненыя, што гэта толькі грошы? Ці сьвет будзе сутыкацца з узбагачаным іранскім рэжымам?», — запытаў ён.
«Я ўпэўнены, што ніхто ня хоча, каб на Блізкім Усходзе і ў раёне Пэрсыдзкай затокі нам давялося зноў гаварыць пра новыя санкцыі. Тэрарысты зноў намагаюцца адаптавацца да гэтых санкцый і абмежаваньняў. Паралельны імпарт, танкеры, якія ідуць па морах... Або мы павінны бачыць уплыў гэтага нелегальнага прыбытку Расеі ў спробах зьнішчыць вашу палітычную сыстэму і міжнародныя інстытуты, дэстабілізаваць ваша сацыяльнае жыцьцё?» — дадаў Уладзімір Зяленскі.
Паводле яго, эскаляцыя ў гэтых рэгіёнах будзе адчувальнай для Эўропы.
«Лібія, Малі, Цэнтральна-Афрыканская Рэспубліка, дзе Расея мае ўплыў. Што чакае Сырыю? Нічога добрага, як і шмат іншых народаў. Гэта ня толькі пра Ўкраіну. Сутнасьць у тым, што Галіят павінен прайграць. І гэтаму няма альтэрнатывы, таму што Крэмль можа зьнішчыць бясьпеку. Калі ўсе, хто тут, будуць адкладаць свае рашэньні, гэта будзе рэсурсам пуцінскай дыктатуры, на якім яна жыве. Так было гадамі», — перакананы прэзыдэнт Украіны.
Зяленскі паведаміў, што ўкраінскае войска вызваліла 1891 населены пункт, што Расея захапіла з пачатку свайго ўварваньня ва Ўкраіну амаль год таму.
«Няма альтэрнатывы перамозе Ўкраіны, няма альтэрнатывы Ўкраіне ў Эўразьвязе, Украіне ў NATO. Няма альтэрнатывы нашаму адзінству, таму няма і ня будзе альтэрнатывы таму, каб пазбавіцца расейскай агрэсіі канчаткова, вызваліць зямлю і людзей, таму што гэтыя землі і людзі — у палоне. І гэта ня можа быць пытаньнем кампрамісу», — заявіў Уладзімір Зяленскі.
Без уладаў Расеі і Беларусі
Прадстаўнікі ўладаў Расеі сёлета не запрошаныя на Мюнхэнскую міжнародную канфэрэнцыю па бясьпецы, заявіў старшыня канфэрэнцыі Крыстаф Гойсген у інтэрвію тэлеканалу MDR 1 лютага.
«Выказваньні, якія мы штодня чуем з Крамля, не дазваляюць вывесьці, што Расея хаця б на ёту адступіць ад таго, што Пуцін абвясьціў мэтай вайны, а менавіта разбурэньня Ўкраіны», — растлумачыў Гойсген.
Замест урадавых чыноўнікаў ад Расеі запрасілі прадстаўнікоў грамадзянскай супольнасьці і апазыцыі, у тым ліку былога чэмпіёна сьвету ў шахматах Гары Каспарава і апальнага алігарха Міхаіла Хадаркоўскага.
Мінулы форум у лютым 2022 году таксама прайшоў без удзелу афіцыйнай расейскай дэлегацыі. Тады Расея ўпершыню за апошнія два дзесяцігодзьдзі адмовілася браць удзел у форуме.
Інфармацыі пра запрашэньне кагосьці з уладаў Беларусі на сёлетнюю канфэрэнцыю ў Мюнхэн таксама няма.
Беларусь брала ўдзел у Мюнхэнскай канфэрэнцыі з 2006 году. У 2018 годзе кіраўніцтва Мюнхэнскай канфэрэнцыі прапанавала правесьці чарговую сустрэчу Асноўнай групы ў Менску, абгрунтаваўшы гэта ўкладам, які тады ўносіла Беларусь ва ўмацаваньне стабільнасьці і бясьпекі ў рэгіёне, і магчымасьцю сабраць на беларускай пляцоўцы ключавых гульцоў.
Сустрэчу тады прысьвяцілі ўзаемаадносінам па лініі Ўсход — Захад, абмеркаваньню рэгіянальных канфліктаў, менскага працэсу, а таксама эканамічнай сытуацыі ва Ўсходняй Эўропе.
Ціханоўская ў Мюнхэне
Тым часам Сьвятлана Ціханоўская прыбыла на Мюнхэнскую канфэрэнцыю па бясьпецы, 17 лютага яна ўжо сустрэлася зь Ільвай Югансан, камісаркай унутраных справаў Эўракамісіі.
Заплянаваныя яе сустрэчы з прэзыдэнткай Эўракамісіі Урзуляй фон дэр Ляен, канцлерам Нямеччыны Оляфам Шольцам, міністрам замежных спраў Нямеччыны Анналенай Бэрбак, новым прэзыдэнтам Чэхіі Пэтрам Павэлам, міністрамі краін Эўразьвязу.
Сьвятлана Ціханоўская 17 лютага ўжо сустрэлася зь Ільвай Югансан, камісаркай унутраных справаў Эўракамісіі.
«З апошняй сустрэчы мы рушылі наперад. Я падзякавала Эўразьвязу за неўвядзеньне візавых забарон для беларусаў. Далей мы будзем працаваць над [спрашчэньнем] шэнгенскіх візавых працэдур, легалізацыяй у ЭЗ і праектам пашпарта», — напісала Ціханоўская па выніках сустрэчы.
Ціханоўская 17 лютага таксама возьме ўдзел у публічнай дыскусіі «Размова пра Ўкраіну, Беларусь і эўрапейскія свабоды», якую ладзіць Цэнтар эўрапейскай будучыні.
З 19:30 да 22:00 у Мюнхэне адбудзецца сусьветная прэм’ера дакумэнтальнага фільма пра Ціханоўскую «Вартавыя праўды: Джан Дзюндар сустракае Сьвятлану Ціханоўскую».
Ціханоўская была на Мюнхэнскай канфэрэнцыі па бясьпецы і ў 2022 годзе.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- 17 лістапада Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
