Як улады тлумачаць далучэньне радыёзаводу да «Гомсельмаша»
Гомельскае тэлебачаньне (канал «Беларусь 4») 10 студзеня сьцісла паведаміла пра далучэньне Гомельскага радыёзаводу да холдынгу. У сюжэце зазначылі, што «Гомсельмаш» нарошчвае аб’ёмы вытворчасьці «ў тым ліку дзякуючы беларуска-расейскаму праекту па імпартазамяшчэньні». Што гэта за праект — не паведамляецца.
«Нашым суседзям (маецца на ўвазе Расея. — РС) будуць накіроўвацца камплекты складаных дэталяў, якія раней імпартаваліся зь іншых краін», — гаварылася ў сюжэце.
Па вэрсіі дзяржаўнай прапаганды, радыёзавод спатрэбіўся «Гомсельмашу» таму, што мае «дадатковыя плошчы» і кадравы патэнцыял. Паводле афіцыйных дадзеных, на радыёзаводзе ў Гомлі цяпер працуюць 164 чалавекі. «Мы пачалі супрацоўніцтва з радыёзаводам у сярэдзіне мінулага году, калі атрымалі заказ на выпуск імпартазамяшчальнай прадукцыі», — паведаміў галоўны інжынэр «Гомсельмаша» Віктар Пінчук. Што гэта за прадукцыя — ён не сказаў.
Пра таямнічы «беларуска-расейскі праект па імпартазамяшчэньні» піша і гомельскае выданьне «Белка», паўтараючы слова ў слова за тэлебачаньнем пра «камплекты складаных дэталяў».
«Праблемы з выплатай заробкаў зьявіліся ў 2017 годзе, тады мы пачалі браць крэдыты і скарачаць штат. І хоць у 2021–2022 сытуацыю ўдалося больш-менш выраўняць, старыя даўгі даюць пра сябе знаць. За мінулы год фінансавыя страты заводу склалі 900 тысяч рублёў, 450 зь іх — даўгі за электраэнэргію мінулых гадоў», — паведаміў выданьню дырэктар радыёзаводу Ігар Сямкоўскі.
Рамонт бранятэхнікі і артылерыйскіх сыстэм
Гомельскі радыёзавод быў заснаваны ў 1969 годзе. У савецкія гады тут працавалі 10 тысяч чалавек, цяпер жа штат — 164 супрацоўнікі.
У 2010 годзе прадпрыемства ўжо «ўставала з калень» — займалася вайсковай вытворчасьцю: рамонтам бранятэхнікі, артылерыйскіх сыстэм, тут рабілі радыёлякацыйнае абсталяваньне. Замовы паступалі з краін Усходу, у тым ліку Сырыі і Лібіі.
На чарговым этапе заняпаду, які прыпаў на наступнае дзесяцігодзьдзе (2010–2020 год), радыёзавод прапаноўваў спажыўцам палівалкі, транспартэры для гародніны, прычэпы, табурэткі і сталы, люстры.
«На радыёзавод езьдзяць работнікі „Гомсельмаша“, фарбуюць гарматы і вайсковую тэхніку з фронту»
Крыніца Свабоды паведаміла, што цяпер Гомельскі радыёзавод рамантуе вайсковую тэхніку, якая прыйшла «пабітая» з фронту ва Ўкраіне.
«Прынамсі, цяпер езьдзяць работнікі „Гомсельмаша“ ў камандзіроўкі на радыёзавод і фарбуюць там гарматы і вайсковую тэхніку. Сам радыёзавод яшчэ два-тры гады таму быў цалкам труп, за тры апошнія гады скарацілі пэрсанал з 550 да 160 чалавек, распрадавалі маёмасьць. Цяпер у іх нейкі сакрэтны „беларуска-расейскі праект“, няцяжка здагадацца які», — мяркуе суразмоўца.
Іншая крыніца расказвае, што цяпер падземныя цэхі радыёзаводу «акупавалі вайскоўцы». «Там ёсьць закрытыя падземныя цэхі, там цяпер толькі вайскоўцы, цывільных туды і не дапускаюць. Вайскоўцы заяжджаюць туды на сваёй тэхніцы, прычым без надгляду», — кажа суразмоўца.
На сайце радыёзаводу паведамляецца, што гэта «адно з найбольш стабільных прадпрыемстваў у галіне машынабудаваньня». «Прадпрыемства ажыцьцяўляе капітальны рамонт зэнітна-ракетных, артылерыйскіх і радыёлякацыйных сыстэм».
Паводле той жа старонкі ў інтэрнэце, Гомельскі радыёзавод вырабляе, сярод іншага, камплекты запасных частак і абсталяваньня да гармат-гаўбіц «Хіцін», самаходнай гаўбіцы «Акацыя», і гарматы «Гіяцынт-Б». Завод робіць таксама капітальны рамонт і мадэрнізацыю зэнітна-ракетных комплексаў С-300В, «Стрела-10М», «Бук», радыёлякацыйных станцый «Небо», аўтаматычнага мінамёта «Василек» і іншых, рамантуе і мадэрнізуе вайсковую тэхніку.
Што зь іншай вайсковай актыўнасьцю на Гомельшчыне?
Жыхары Гомля расказваюць, што рэгулярна бачаць у горадзе расейскіх вайскоўцаў. «Але іх не так шмат, як гэта было ўвесну. Зрэдку можна сустрэць у крамах ці ў цэнтры гораду», — кажа жыхар Гомля.
Ён дадаў, што бачыў, як па Гомлі рухаліся чатыры аўтамабілі «КАМАЗ» з прычэпамі, якія везьлі супрацьтанкавыя бэтонныя трохвугольнікі. «Ехалі з боку мікрараёну Сяльмаш, далей па вуліцы Барыкіна ў бок заводу вымяральных прыбораў. Магчыма, на мяжу з Украінай паехалі», — сказаў жыхар Гомля.
