4 студзеня дачцэ журналіста Свабоды Ігара Лосіка і Дар’і Лосік Паўліне споўнілася чатыры гады. Свой дзень народзінаў Паўліна сустрэла з бабулямі і дзядулямі.
Ейныя бацькі цяпер знаходзяцца за кратамі. Ігар адбывае пакараньне ў Наваполацкай калёніі, Дар’я знаходзіцца ў Берасьцейскім СІЗА.
Бяз таты Паўліна сустракае дзень народзінаў ужо трэці раз, Ігара арыштавалі 25 чэрвеня 2020 году. 14 сьнежня 2021 яму прысудзілі 15 гадоў пазбаўленьня волі ў калёніі ўзмоцненага рэжыму. Дар’ю Лосік затрымалі 18 кастрычніка 2022 году, яе абвінавачваюць у садзейнічаньні экстрэмісцкай дзейнасьці за камэнтар тэлеканалу «Белсат» аб умовах утрыманьня Ігара Лосіка ў калёніі. Справу Дар’і ужо перадалі ў суд, працэс павінен пачацца неўзабаве.
Трохгадовую Паўліну пасьля затрыманьня Дар’і ўзялі да сябе яе бацькі. Сем’і Ігара і Дар’і апякуюцца дзяўчынкай па чарзе, яна ходзіць у садок.
Павітаць зьняволеных бацькоў Паўліны лістом, тэлеграмай можна па адрасах:
- Лосік Дар’і Аляксандраўне, 224030, вул. Савецкіх пагранічнікаў, 37, СІЗА-7, Берасьце, Беларусь
- Лосіку Ігару Аляксандравічу, ПК № 1, 211445, г. Наваполацак, вул. Тэхнічная, 8, 7 атрад.
Для Дар’і Лосік магчымасьці адпраўляць пасылкі няма, яны ўваходзяць у ліміт перадач. Яна можа атрымліваць грашовыя пераводы на паштовы адрас СІЗА-7 або праз інтэрнэт можна зрабіць плацёж па рэквізытах:
- УНП: 200292322
- BIC: BAPBBY2X
- IBAN: BY49BAPB36429921800110000000
Крымінальны перасьлед Ігара Лосіка
На журналіста Радыё Свабода і блогера Ігара Лосіка ў 2020 годзе завялі крымінальныя справы паводле ч. 1 арт. 342 Крымінальнага кодэксу («падрыхтоўка да парушэньня грамадзкага парадку») і ч. 2 арт. 293 («падрыхтоўка да ўдзелу ў масавых беспарадках»).
Лосіка затрымалі 25 чэрвеня 2020 году пасьля ператрусу дома ў Баранавічах. На ягоны тэлеграм-канал «РБ головного мозга» ў той момант былі падпісаныя 167 тысяч чалавек.
Ігар Лосік актыўна асьвятляў падзеі выбараў прэзыдэнта Беларусі. Праваабаронцы прызналі яго палітвязьнем.
15 сьнежня 2020 году, пасьля выстаўленьня другога абвінавачаньня, Ігар Лосік абвясьціў галадоўку пратэсту і трымаў яе да 25 студзеня 2021 году.
11 сакавіка 2021 году Лосіку выставілі новае абвінавачаньне. На знак пратэсту Ігар пашкодзіў сабе запясьце на вачах у адваката і сьледчага, а таксама абвясьціў сухую галадоўку. За гэта Лосіка зьмясьцілі ў карцар сьледчай турмы Жодзіна. Там ён прабыў пяць дзён, чатыры зь якіх трымаў сухую галадоўку.
- 14 сьнежня 2021 году ў будынку СІЗА-3 ў Гомлі судзьдзя Мікалай Доля прысудзіў Ігару Лосіку 15 гадоў зьняволеньня. Яго прызналі вінаватым паводле двух артыкулаў Крымінальнага кодэксу — «Распальваньне сацыяльнай варажнечы і непрыязі ў адносінах да прадстаўнікоў улады і праваахоўных органаў, учыненае групай асобаў» (ч.3 арт.130) і «Арганізацыя масавых беспарадкаў, якія суправаджаліся пагромамі падпаламі, зьнішчэньнем маёмасьці і ўзброеным супрацівам прадстаўнікам улады» (ч.1 ст.293).
- Жонку Ігара Лосіка Дар’ю пакаралі 2 гадамі зьняволеньня ў калёніі агульнага рэжыму (паводле арт. 361-4 Крымінальнага кодэксу, «Садзейнічаньне экстрэмісцкай дзейнасьці») за інтэрвію пра мужа, у якім яна, паводле абвінавачаньня, «пазыцыянавала сябе як жонка палітвязьня». Прысуд Дар’і Лосік вынес 19 студзеня 2023 году судзьдзя Берасьцейскага абласнога суду Мікалай Грыгаровіч.
