Прысуд за сарваны сьцяг
У судзе Бабруйскага раёну і гораду Бабруйску вынесьлі прысуд студэнту трэцяга курсу БНТУ Мікіту Маляру, абвінавачанаму ў апаганьванні дзяржаўных сымбаляў (арт. 370 КК), піша ПЦ «Вясна».
Па матэрыялах абвінавачаньня, 20-гадовы Мікіта разам зь сябрам восеньскім вечарам прагульваўся па Бабруйску і каля адной з крам, наўмысна падскочыўшы, рукой схапіўся за палотнішча сьцяга Беларусі, усталяванага на дрэўку ў мэталічным кранштэйне, зь сілай пацягнуў яго ўніз. У выніку чаго сьцяг разам з фрагмэнтам тронка адламаўся ад месца мацаваньня і ўпаў на ходнік.
Затым, утрымліваючы сьцяг у руках за тронак, абвінавачаны прабег ня менш як 20 мэтраў, размахваючы ім. На другі дзень палотнішча выкінулі на вуліцу.
Судзьдзя Антон Дудаль прысудзіў Маляру абмежаваньне волі з накіраваньнем у папраўчую ўстанову адкрытага тыпу тэрмінам на 2 гады.
