«Бо для сьвята людзям патрэбныя іншыя людзі. Яны скажуць цёплыя словы, падораць падарункі, упрыгожаць дамы і вуліцы і, галоўнае, зьдзейсьняць цуды. Што гэта за сьвята без цудаў?», — лічаць актывісты ініцыятывы.
Яны прапануюць праз сайт svyata.hutka.help выбраць, «для каго стаць асабістым Дзедам Марозам і стварыць навагодняе чараўніцтва. Там таксама можна пачытаць гісторыі беларусаў і беларусак, якім зараз так не хапае сьвяточнага настрою і цудаў».
Сутнасьць акцыі, паводле праекту «Хуткая ўзаемадапамога», у тым, каб аб’яднацца са сваімі блізкімі і зрабіць навагоднія цацкі разам.
Што можна рабіць
- Глядзець ролікі, у якіх расказваюць, як можна зрабіць упрыгажэньні для ялінкі ці кватэры.
- Рабіць арыгамі паводле інструкцыяў. Гэта проста і весела дапаможа бавіць час з блізкімі і сябрамі.
- Выкладваць фатаздымкі папяровых герояў у сацыяльных сетках з хэштэгам #ПадзялісяСвятам.
- Данаціць сем’ям, якія сталі ахвярамі беларускага рэжыму ці былі вымушаныя ўцякаць спачатку зь Беларусі, а потым і з Украіны.
- Па грашовую падтрымку ў «Хуткую ўзаемадапамогу» могуць зьвяртацца ня толькі пацярпелыя ад рэпрэсіяў падчас або пасьля выбараў 2020 году беларусы, але і актывісты, якія сталі двойчы ўцекачамі ў выніку нападу Расеі на Ўкраіну. Стваральнікі «Хуткай узаемадапамогі» адзначаюць, што гэта ня фонд, а праект, які наўпрост зьвязвае тых, каму патрэбна дапамога, і гатовых дапамагчы.
