Пра гэта паведамляецца на старонцы Дому правоў чалавека імя Звоскава ў фэйсбуку.
У намінацыі «Праваабронца году-2022» названыя Ўладзімер Лабковіч, Павал Левінаў і Наста Лойка.
У намінацыі «Журналіст году-2022» вылучаныя Яўген Атцецкі, Марына Золатава і Аксана Колб.
У намінацыі «Праваабарончая кампанія/ініцыятыва году-2022» названыя Майстэрня паштовак салідарнасьці, Міжнародны камітэт па расьсьледаваньні катаваньняў у Беларусі і Беларускі фонд мэдычнай салідарнасьці.
Цырымонія ўзнагароджваньня пераможцаў адбудзецца анлайн 20 сьнежня, пачатак а 16 гадзіне паводле менскага часу. Трансьляцыя будзе весьціся на старонцы Дому правоў чалавека імя Звоскава.
- Праваабарончая прэмія за дасягненьні ў галіне правоў чалавека была заснаваная ў 2008 годзе. Першымі ляўрэатамі сталі праваабаронца Барыс Звоскаў, адвакат Тамара Сідарэнка, журналіст Сямён Печанко. За гады з моманту заснаваньня прэмія пашырылася і сёньня ёсьць прэміяй, якой беларуская праваабарончая супольнасьць штогод адзначае праваабаронцу году, журналіста году, адваката году (да 2015 г.) і ад 2016 году — праваабарончую кампанію ці ініцыятыву году — за ўнёсак у абарону і прасоўваньне правоў чалавека.
