У Менскім гарадзкім судзе абвясьцілі прысуды былому журналісту Белтэлерадыёкампаніі і пазаштатнаму карэспандэнту казахстанскага тэлеканала «Хабар 24» Дзьмітрыю Лукшу, ягонай жонцы Паліне Палавінцы, Дзянісу Яроўскаму, а таксама Канстанціну Ніканораву. Іх абвінавачвалі ў «дыскрэдытацыі Беларусі», а таксама «актыўным удзеле ў групавых дзеяньнях, якія груба парушаюць грамадзкі парадак».
У выніку, як паведамляе «Вясна», судзьдзя Натальля Бугук прызначыла:
- Дзьмітрыю Лукшу — 4 гады калёніі ва ўмовах агульнага рэжыму і штраф у памеры 500 базавых (16 000 рублёў);
- Паліне Палавінцы — 2,5 года калёніі ва ўмовах агульнага рэжыму і штраф у памеры 100 базавых (3 200 рублёў);
- Дзянісу Яроўскаму — 1,5 года калёніі ва ўмовах агульнага рэжыму і штраф у памеры 100 базавых (3 200 рублёў);
- Канстанціну Ніканораву — 3 гады «хатняй хіміі» і штраф у памеры 100 базавых (3 200 рублёў).
Суд над былым вядоўцам тэлеканалу «Беларусь-1» Дзьмітрыем Лукшам, ягонай жонкай Палінай Палавінкай і відэаапэратарам Канстанцінам Міканоравым пачаўся 18 лістапада.
У справе праходзілі таксама Анастасія і Дзяніс Яроўскія.
Дзьмітрыю і ягонай жонцы Паліне ставяць у віну ч. 1 арт. 342 КК («актыўны ўдзел у групавых дзеяньнях, якія груба парушаюць грамадзкі парадак») і арт. 369-1 КК («дыскрэдытацыя Беларусі»).
Канстанціну Ніканораву інкрымінуюць толькі арт. 369-1 КК.
Паводле вэрсіі абвінавачаньня, Лукша дзеля дыскрэдытацыі краіны з дапамогай апэратара вырабіў шэраг відэасюжэтаў, якія зьмяшчалі загадзя лжывую інфармацыю:
«Па яго ўказаньні жонка, хаваючы свой твар, назвалася грамадзянкай Сырыі, якая нібыта жыве ў стыхійным лягеры ў Беларусі. Яна агучыла загадзя падрыхтаваны тэкст зь непраўдзівымі зьвесткамі аб невыкананьні правоў мігрантаў, незадавальненьні іх базавых патрэбаў, дэфіцыце вады і ежы, пры гэтым Лукша пацьвердзіў, што асабіста назіраў гэтыя парушэньні».
«На відэа, зьнятым за мяжой, на якім дэманстраваўся дэфіцыт тавараў і валюты, Лукша наклаў свой закадравы голас, пры гэтым паведаміў, што ў сюжэце паказана сытуацыя ў Беларусі».
Лукша працаваў няштатным карэспандэнтам казахстанскага тэлеканалу «Хабар 24». Лукша, Палавінка і Яроўскі знаходзяцца пад вартай. Жонка Дзяніса Анастасія на суд не зьявілася.
Дзьмітрыя Лукшу затрымалі пасьля ператрусу ў кватэры сёлета ў Менску 11 сакавіка. Раней ён шмат гадоў працаваў у Белтэлерадыёкампаніі, быў вядоўцам праграмы «Зона X».
На момант затрыманьня Дзьмітры працаваў няштатным карэспандэнтам казахстанскага тэлеканалу «Хабар 24», падставай для затрыманьня стаў ягоны апошні сюжэт на канале.
Паліну Палавінку затрымалі 2 чэрвеня.
