У ноч на 23 лістапада расейскія войскія абстралялі радзільнае аддзяленьне ў горадзе Вальнянск Запароскай вобласьці, у выніку чаго загінула толькі народжанае дзіця.
За дзень — пяць ракетных і 45 артылерыйскіх абстрэлаў
Генэральны штаб Узброеных сіл Украіны паведаміў, што за апошнія содні Расея нанесла 5 ракетных і каля 45 артылерыйскіх удараў па паселішчах Харкаўскай, Данецкай, Херсонскай, Днепрапятроўскай і Запароскай вобласьцяў.
«Уначы расейскія пачвары абстралялі вялізнымі ракетамі маленькую радзільню Вальнянскай лякарні. Горам перапоўненыя нашы сэрцы — загінула немаўля, якое толькі што зьявілася на сьвет», — паведаміў кіраўнік Запароскай абласной вайсковай адміністрацыі Аляксандар Старух.
Алена Зяленская аб гібелі немаўляці пасьля ўдару па радзільні: «Гэта жудасны боль»
Першая лэдзі Ўкраіны выказала спачуваньні ў сувязі з гібельлю нованароджанага немаўляці пры расейскім ракетным удары па радзільным адзьдзяленьні ў Вальнянску Запароскай вобласьці.
У выніку ракетнага ўдару на тэрыторыі мясцовай бальніцы быў разбураны двухпавярховы корпус радзільні. На той момант там знаходзілася адна жанчына з нованароджаным дзіцем, а таксама лекар.
«Злачынствы РФ — гэта вар’яцтва, — напісала Алена Зелянская ў „Твітэры“. — Жудасны боль. Мы ніколі не забудземся і ніколі не прабачым».
Маці дзіцяці, якое зьявілася на сьвет два дні таму, а таксама лекара ратавальнікам удалося выцягнуць з-пад завалаў жывымі.
Вальнянская цэнтральная раённая бальніца знаходзіцца прыкладна за 30 км на паўночны ўсход ад цэнтра Запарожжа.
Мэдычныя ўстановы могуць стаць новым прыярыэтам расейскіх абстрэлаў
Выведка Міністэрства абароны Вялікай Брытаніі паведаміла, што зь верасьня Расея спалучае выкарыстаньне іранскіх бесьпілётнікаў з адначасовымі ракетнымі абстрэламі.
Але дагэтуль такая зброя выкарыстоўвалася супраць тактычных вайсковых аб’ектаў і энэргетыкі.
Цяпер, паводле брытанскіх выведнікаў, расейскае камандаваньне хоча, каб іранскія бесьпілётнікі білі пераважна па мэдычных установах.
Але пры гэтым у выведцы Вялікай Брытаніі зьвярнулі ўвагу, што з 17 лістапада не было публічных паведамленьняў аб выкарыстаньні дронаў, што можа сьведчыць аб заканчэньні запасаў.
Імаверна, паведамляюць брытанскія выведнікі, Расея хоча кампэнсаваць дронамі сур’ёзны недахоп ракет. «Але такі падыход меў абмежаваны посьпех — большасьць запушчаных бесьпілётнікаў былі абясшкоджаныя», — нагадалі ў выведцы.
Паводле вайсковай выведкі Вялікай Брытаніі, Расея можа закупіць дроны за мяжой хутчэй, чым вырабіць новыя крылатыя ракеты ўнутры краіны.
Расея актывізавала падрыхтоўку апэратараў дронаў
У Генэральным штабе Ўзброеных сіл Украіны паведамілі, што ў Севастопалі, на тэрыторыі акупаванага Крыму, на базе адной з навучальных установаў пачалі рыхтаваць апэратараў бесьпілётнікаў як расейскай, гэтак і іранскай вытворчасьці.
«Тэрмін падрыхтоўкі гэтых спэцыялістаў складае да трох тыдняў. Цяпер праходзяць падрыхтоўку каля 30 вайскоўцаў», — паведамілі ў Генэральным штабе Ўкраіны.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.