Пра падрабязнасьці хваляваньняў сярод вязьняў бабруйскай калёніі паведамляе праваабарончы цэнтар «Вясна».
«Вясна» нагадвае, што ў ноч з 12 на 13 жніўня 2020 году зьняволеныя ў калёніі, як і тыя беларусы, якія знаходзіліся на мірных акцыях пратэсту па ўсёй Беларусі, вырашылі выказаць сваю нязгоду зь дзейнай уладай. У інтэрнэце зьяўляліся відэа і аўдыё, на якіх чуваць крыкі «Сыходзь!» і шум з будынка калёніі.
Адным днём хваляваньні не абмежаваліся.
«Бунт быў вельмі моцны, — расказаў праваабаронцам адзін з былых вязьняў калёніі. — Ён быў такі, што каля калёніі нават стаялі вайскоўцы. Людзі і «Жыве Беларусь» крычалі, і вывешвалі самаробныя бел-чырвона-белыя сьцягі ў акенцах. Настолькі быў моцны бунт, што падыходзілі вайскоўцы і казалі: «Цішэй, супакойцеся, мы выканаем усё, што вы патрабуеце». Ніхто ня спаў пасьля адбою, хадзілі, выносілі ложкі на вуліцы. Туды прывозілі сваякоў і матуль. Але ўрэшце, калі бунт быў здушаны, людзі пачалі зьнікаць. Некаторых пераводзілі на «крытыя». Ведаю, што шэсьць чалавек, якія нібыта ўзначальвалі гэты пратэст, былі пераведзены на «крытую» да канца тэрміну. А тэрміны ў іх па пяць-шэсьць гадоў. Некаторыя прайшлі праз штрафныя ізалятары. І тэрміны ім працягвалі да 50 сутак.
Пасьля бунту былі зьменены ўсе лякацыі. На тэрыторыі нават не было платоў, і вязьні хадзілі як хацелі. А цяпер паставілі паміж лякацыямі платы з калючым дротам. Прыкладна за месяц яны ўсё гэты зладзілі. Паставілі электронныя замкі і камэры відэаназіраньня. Пасьля бунту начальнік калёніі рабіў сход, дзе зьбіраліся ўсе вязьні ў клюбе, і сказаў: «Адзінае, што я зразумеў, што людзі павінны адсюль выходзіць».
Паводле іншага былога зьняволенага, у хваляваньнях у Бабруйскай калёніі ўдзельнічалі больш за тысячу чалавек.
