Рада ЭЗ зацьвердзіла санкцыі супраць Ірану за пастаўкі бесьпілётнікаў, якія нанесьлі ўдары па Ўкраіне, паведаміла ў Twitter старшынства Чэхіі ў Радзе.
«Санкцыі да Ірану ў рэкордна кароткія тэрміны! Пасьля трохдзённых перамоваў паслы ЭЗ дамовіліся аб мерах супраць арганізацый, якія пастаўляюць іранскія бесьпілётнікі, якія нанесьлі ўдары па Ўкраіне. Пісьмовая працэдура завершана, санкцыі ўступаюць у сілу сёньня ўдзень, пасьля публікацыі ў Афіцыйным часопісе ЭЗ», — гаворыцца ў паведамленьні.
Чэскі бок дадае, што «краіны ЭЗ вырашылі замарозіць актывы трох фізычных асоб і адной юрыдычнай асобы, адказных за пастаўкі дронаў», таксама паведамляецца аб гатоўнасьці ЭЗ пашырыць санкцыі яшчэ ў дачыненьні да чатырох іранскіх арганізацый, якія ўжо фігуравалі ў папярэднім сьпісе санкцый.
Раней агенцтва Reuters са спасылкай на свае крыніцы заявіла, што ў санкцыйныя сьпісы ўнесены тры іранскія генэралы, у тым ліку брыгадны генэрал Корпусу вартавых ісламскай рэвалюцыі Саід Агхаджані, на якога раней наклалі санкцыі ЗША (ён, як паведамляецца, адказвае за іранскую праграму разьвіцьця баявой бесьпілётнай авіяцыі). Таксама, як паведамляецца, пад санкцыі падпадзе вытворца дронаў, карпарацыя Shahed Aviation Industries.
Расейскі чыноўнік прагаварыўся
Дырэктар Цэнтра аналізу стратэгій і тэхналёгій і сябра Грамадзкай рады пры Мінабароны РФ Руслан Пухаў у эфіры праграмы «Што гэта значыць» на расейскім тэлеканале РБК, папрасіў не казаць пра іранскія дроны, паколькі ўлады краіны не прызнаюць іх пастаўкі.
Пухаў думаў, што мікрафон выключаны і яго не чуваць. Увагу на гэта зьвярнула журналістка Арына Барадзіна.
«Моцна лодку разгойдваць ня будзем, таму я вельмі вас прашу моцна на гэтых іранскіх [дронах]... Таму што гэта клясыка гісторыі, дупа ёсьць, а слова няма. Мы ўсе ведаем, што яны іранскія, але ўлады не прызнаюць», – сказаў Пухаў падчас эфіру.
Ва Ўкраіне і заходніх краінах заявілі, што Расея выкарыстоўвае ў вайне робат-дромы-камікадзэ Shahed-136 іранскай вытворчасьці. У Расеі гэтыя беспілотнікі называюць «Герань-2» і адмаўляюць іх іранскае паходжаньне.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- 17 лістапада Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
