17,9% гадавых — такую інфляцыю зафіксавалі ў Беларусі ў жніўні, на такі адсотак у сярэднім за год вырасьлі цэны. Пры гэтым некаторыя прадукты падаражэлі больш. Напрыклад, капуста за год падаражэла на 50%, рыба — на 36%. У Менску і іншых гарадах цяпер наплыў расейцаў, якія ўцякаюць ад мабілізацыі.
«Можа вырасьці арэнда»
Паводле акадэмічнай дырэктаркі Beroc Кацярыны Барнуковай, прыезд расейцаў пэўна можа паўплываць на цэны на арэнду.
«Пакуль не зразумела, на колькі яны прыехалі і колькі іх прыехала. Магчыма, праз тыдзень яны вырашаць вярнуцца дадому. Тым больш, што Беларусь для іх не падаецца бясьпечнай, іх цалкам могуць выціснуць у Расею. Ужо ёсьць уплыў на цэны на кароткатэрміновую арэнду. Верагодна, гэта можа ажывіць і рынак доўгатэрміновай арэнды, бо гэты рынак быў у заняпадзе», — кажа Кацярына Барнукова.
На доўгатэрміновую арэнду цэны могуць вырасьці, калі расейцы застануцца надоўга, то бок пачнуць наймаць кватэры не па сутках, а на месяц і болей.
Што тычыцца іншых цэнаў, пакуль няясна, як гэта на іх адаб’ецца.
«Шопінг выходнага дня з Расеі можа больш паўплываць на цэны, чым тыя, хто ўцякае ад мабілізацыі. Ня думаю, што іх у Беларусі больш за некалькі дзясяткаў тысяч. Пакуль не падобна, што гэта моцна адаб’ецца на іншых цэнах», — кажа Кацярына Барнукова.
Як людзі рэагуюць на рост цэнаў
Чытачы Свабоды расказваюць, што цэны ўнутры Беларусі растуць, але пакуль ня зьвязваюць гэта з мабілізацыяй у Расеі.
«З пачатку верасьня ляжала ў шпіталі, а ўчора вярнулася дахаты, і мяне вельмі ўразіў першы паход у краму. Тое, што прадукты харчаваньня і сродкі гігіены сталі каштаваць болей, ужо ня ўражвае — амаль што звыкліся з новай рэчаіснасьцю. А вось тое, што пачак сродкаў кантрацэпцыі стаў каштаваць у 2,5 раза больш — гэта тое, на што падае зрок, пакуль стаіш на касе, — гэта, вядома, вельмі ўразіла», — расказала чытачка Свабоды.
Заўважылі чытачы і павышэньне цэнаў на іншыя тавары:
«Напрыклад, сярод першага, што прыходзіць на думку: шампунь Schauma — вялікая бутэлька раней каштавала менш за 5 рублёў, а цяпер больш за 20. Мыла Dove — вялікі кавалак каштаваў менш за 3 рублі, а цяпер больш за 5. Тампоны OB раней каштавалі 6–8 рублёў, а цяпер 10–12 рублёў. Сыр — не які-небудзь камамбэр, а звычайны, айчынны, раней каштаваў 12–14 рублёў, зь якімі мы амаль звыкліся, а цяпер найтаньнейшы каштуе амаль 19 рублёў», — дадаюць чытачы.
Што на рынку нерухомасьці
Пакуль рыэлтары, зь якімі кантактавала Свабода, ня могуць сказаць, што наплыў расейцаў моцна адбіўся на рынку нерухомасьці. Спэцыялісты кажуць, што яны набывалі кватэры і раней, але агулам на рынак гэта ня надта паўплывала.
Напрыклад, апартамэнты ў самым цэнтры Менску з джакузі і камінам у стылі лофт каштуюць 60 даляраў за суткі.
Трохпакаёвыя апартамэнты з саўнай у самым цэнтры Менску, на вуліцы Кірава, каштуюць 70 даляраў на суткі.
Кватэра далей ад цэнтру, на Аўтазаводзкай, каштуе 40 даляраў на суткі.
