Нацыянальны саюз журналістаў Украіны паведаміў, што з пачатку поўнамаштабнай расейскай вайны ва Ўкраіне загінулі 39 журналістаў, у тым ліку восем — у часе выкананьня прафэсійных абавязкаў, 13 — цывільных ахвяр і 18 грамадзян, якія мабілізаваліся ў войска.
Паводле журналісцкай арганізацыі, яшчэ двое журналістаў-вайскоўцаў лічацца бязь зьвестак зьніклымі.
16 верасьня ў большасьці рэгіёнаў Украіны адбываюцца акцыі ўшанаваньня памяці ўсіх загінулых журналістаў.
Традыцыйна памятныя захады адбываюцца кожны год у гэты дзень, калі адзначаецца чарговая гадавіна зьнікненьня ўкраінскага журналіста Георгія Гангадзэ. Ён прапаў 16 верасьня 2000 году. Ягоныя парэшткі пахавалі толькі праз 15 гадоў пасьля забойства.
Беларуская асацыяцыя журналістаў (БАЖ) заклікала далучыцца да ўшанаваньня загінулых ва Ўкраіне калег і запаліць зьнічы ў іхную памяць.
У БАЖ таксама паведамілі аб адкрыцьці ў Вільні выстаўкі аб працы журналістаў на вайне. Выстаўку арганізавалі «Інстытут масавай інфармацыі» (Кіеў), «Інтэрньюс» пры падтрымцы Літоўскага клюба фотажурналістаў.
21 верасьня ў Вільні адбудзецца акцыя праваабаронцаў у знак салідарнасьці з Украінай.
