Цягам дасудовага расьсьледаваньня беларусу зьмянілі кваліфікацыю злачынства. Апроч таго, ён пайшоў на ўгоду са сьледзтвам, дзякуючы чаму атрымаў больш мяккае пакараньне — пяць месяцаў арышту.
19 жніўня грамадзянін Беларусі выйдзе на волю, паколькі яму залічылі знаходжаньне пад вартай пасьля затрыманьня ў адбыцьцё прызначанага пакараньня.
Новыя дэталі справы
У судовым выраку адзначаецца, што грамадзянін Беларусі ў першы дзень расейскага ўварваньня на тэрыторыю Ўкраіны перадаў супрацоўніку Камітэту дзяржаўнай бясьпекі Беларусі інфармацыю аб перамяшчэньні калёны вайсковай тэхнікі батальённай тактычнай групы Ўзброеных сіл Украіны ў горадзе Шацк Валынскай вобласьці.
Паводле суду, гэтую інфармацыю «ў пэўных абставінах мог выкарыстаць праціўнік, каб перашкодзіць дзейнасьці Ўзброеных сіл Украіны і іншых сіл абароны і нанесьці шкоду нацыянальным інтарэсам Украіны».
Прозьвішча супрацоўніка КДБ Беларусі вядомае суду і сьледзтву, аднак у судовым рашэньні яно закадыфікавана як «Асоба_4».
У выраку таксама адзначаецца, што беларус пагадзіўся на супрацу з спэцслужбамі Беларусі, бо меў сярод іх прадстаўнікоў знаёмых, якія падтрымліваюць «ідэі вайскова-палітычнага кіраўніцтва Беларусі і Расеі аб палітычнай, ідэалягічнай нецярпімасьці і нянавісьці да ўкраінскай нацыі і дзяржаўнасьці» і чыняць наўмысныя дзеяньні для захопу часткі тэрыторыі Ўкраіны.
22 ліпеня грамадзянін Беларусі падпісаў угоду аб прызнаньні сваёй вінаватасьці і фактаў, сабраных сьледзтвам.
Што вядома пра асуджанага беларуса
Затрыманы беларус пражывае ва Ўкраіне з 2006 году на падставе віду на сталае жыхарства. Мае ва Ўкраіне сям’ю і непаўналетняе дзіця. Да затрыманьня працаваў гандлёвым спэцыялістам адной зь берасьцейскіх кампаній у Валынскай вобласьці. Мае вышэйшую адукацыю. Нарадзіўся ў Маларыцкім раёне Берасьцейскай вобласьці.
Раней адвакат затрыманага беларуса расказваў Свабодзе, што ягонага падабароннага затрымалі тады, калі той зьвярнуўся ў СБУ з паведамленьнем аб намеры спэцслужбаў Беларусі яго завэрбаваць. «Яго затрымалі і абвінавацілі ў шпіянажы. СБУ замест таго, каб выкарыстаць яго як магчымага патэнцыйнага агента ў інтарэсах Украіны, паставіла сабе „птушачку“ і завяла крымінальную справу», — сказаў адвакат.
