Пакуль расейцы абстрэльваюць жылыя раёны і крытычную інфраструктуру, Узброеныя сілы Ўкраіны пашкодзілі Антонаўскі мост у прыгарадзе Херсону, церазь які Расея забясьпечвала свае войскі ў акупаваным Херсоне.
Мікалаеўская вобласьць
Мінулай ноччу ў Мікалаеўскай вобласьці паветраная трывога гучала ці ня кожныя паўгадзіны. Расейцы канцэнтруюць свае ўдары на поўдні і ўсходзе, выкарыстоўваючы пераважна ракетныя ўстаноўкі «Град» і «Ўраган».
Як паведамляюць абласныя ўлады, у некалькіх грамадах у Мікалаеўскім і Баштанскім раёнах абстрэлы пашкодзілі жылыя будынкі. Загарэліся лецішчы мікалаеўцаў, а таксама сухая трава і сельгасугодзьдзі са збожжам.
Улады ўдакладняюць інфармацыю аб пацярпелых.
Харкаў і Нікапаль на Днепрапятроўшчыне
У Харкаве ў выніку абстрэлаў загінулі трое мясцовых жыхароў, у тым ліку 13-гадовы хлопчык. 72-гадовая жанчына атрымала раненьні.
Каторы дзень запар Расея не спыняе абстрэлу Нікапалю Днепрапятроўскай вобласьці. У ноч і раніцай 20 ліпеня на жылы масіў гораду расейцы запусьцілі 31 снарад. Двое грамадзян загінулі, яшчэ дзевяць атрымалі раненьні, у тым ліку чацьвёра дзяцей. У горадзе раскіданыя боепрыпасы, які не ўзарваліся. Цяпер выратавальнікі разьбіраюць завалы і зьнішчаюць неразарваныя снарады.
Сумшчына і Чарнігаўшчына
У Сумскай і Чарнігаўскай вобласьці пасьля невялікага перапынку раніцай 20 ліпеня таксама аднавіліся абстрэлы.
У Сямёнаўскую грамаду Чарнігаўскай вобласьці прыляцела 100 снарадаў, але абышлося без ахвяр.
Шосткінскі раён Сумскай вобласьці абстрэльваюць зь мінамётаў. Улады пакуль не паведамляюць пра пацярпелых ці загінулых.
Украінскія войскі зьнішчылі расейскую РЛС і мост на поўдні
19 ліпеня стала вядома, што Ўзброеныя сілы Ўкраіны ракетным ударам зьнішчылі сучасную расейскую радыёлякацыйную станцыю (РЛС), здольную выяўляць цэлі на малой вышыні.
Гэтая станцыя была разьмешчаная ў акупаваным Расеяй сяле Лазурнае Херсонскай вобласьці. Паведамляецца, што ўкраінскія войскі пацэлілі ў яе з адлегласьці, большай за 100 кілямэтраў.
Узброеныя сілы Ўкраіны таксама пашкодзілі і Антонаўскі мост у прыгарадзе Херсону, церазь які Расея забясьпечвала свае войскі ў акупаваным Херсоне.
Украіна вярнулася на востраў Зьмяіны ў Чорным моры
Галоўнае ўпраўленьне выведкі Міністэрства абароны Ўкраіны паведаміла аб пачатку дасьледаваньня і разьмінаваньня вострава Зьмяінага. Раней на ім ужо ўстанавілі ўкраінскі дзяржаўны сьцяг.
Украінская выведка дадала, што на востраве знайшлі расейскую тэхніку — дроны, зэнітна-ракетныя комплексы, гранатамёты, а таксама журналы вядзеньня баявых дзеяньняў з асабістымі дакумэнтамі расейскіх вайскоўцаў.
Асобна выведнікі паведамілі, што «знайшлі і эвакуавалі на падкантрольную тэрыторыю ўкраінскага ката, які некалькі месяцаў пражыў у акупацыі».
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
