Польшча пачала будаўніцтва пяцімэтровай мэталічнай агароджы на мяжы зь Беларусьсю сёлета ў студзені на фоне міграцыйнага крызісу. Апошнія работы па ўзьвядзеньні загароды працягласьцю амаль 187 кілямэтраў сканчыліся 30 чэрвеня.
Аднак новапабудаваная сьцяна не заўжды перашкаджае мігрантам у іхных спробах нелегальнага перасячэньня беларуска-польскай мяжы.
6 ліпеня польскія памежнікі чарговы раз знайшлі падкопы пад новым плотам. Мігрантаў затрымалі, паведамляе Польская памежная служба.
Нелегальна трапіць зь Беларусі ў Польшчу спрабавалі 24 чалавекі. Сярод іх былі грамадзяне Самалі, Гвінэі, Гамбіі, Турэччыны. Усе іншаземцы, паводле інфармацыі полькай памежнай службы, трапілі ў Беларусь з тэрыторыі Расеі.
На беларуска-польскай мяжы знайшлі цыгарэты ў грузавым цягніку
7 ліпеня стала вядома аб перахопе польскімі мытнікамі кантрабанды цыгарэт у грузавым цягніку, які прыбыў зь Беларусі.
Пры праверцы цягніка ў пункце пропуску «Сямёнаўка» у трох кантэйнэрах з ДСП знайшлі амаль 23 тысячы пачкаў цыгарэт. Іх кошт ацэньваецца ў 330 тысяч злотых (70 тысяч даляраў), паведамляе польская мытня.
