Камітэт Сэнату ЗША па міжнародных адносінах ухваліў у 22 чэрвеня рэзалюцыю аб уключэньні Расеі ў сьпіс краін, якія падтрымліваюць тэрарызм.
Рэзалюцыю запрапанаваў сэнатар-рэспубліканец Ліндсі Грэм 9 траўня, з боку дэмакратаў яе падтрымаў сэнатар Рычард Блюмэнталь.
Як растлумачыў у інтэрвію ўкраінскай службе «Голасу Амэрыкі» сэнатар-рэспубліканец Крыс Кунс, канчатковае рашэньне аб прызнаньні Расеі дзяржавай, якая спансуе дзейнасьць тэрарыстаў, у сувязі зь незаконным уварваньнем на тэрыторыю Ўкраіны, павінна быць прынята адміністрацыяй Джо Байдэна.
«Рэзалюцыя камітэту заклікае адміністрацыю [зрабіць гэта], але фактычна Расея пакуль не вызначана ў якасьці дзяржавы-фундатара тэрарызму», — сказаў сэнатар Кунс.
«Няма сумневаў у тым, што Расея на чале з Уладзімірам Пуціным зьяўляецца дзяржавай-спонсарам тэрарызму. Тое, што ён распачаў, аддаўшы загад ісьці ва Ўкраіну, было тэрарыстычным актам. Ён вайсковы злачынца, і на ім ляжыць адказнасьць за кожнае злачынства, якое было зьдзейсьнена ад яго імя», — заявіў у інтэрвію «Голасу Амэрыкі» Джэймс Рыш, сэнатар-рэспубліканец ад штату Айдаха.
Рыш лічыць, што на агульным галасаваньні ў Сэнаце рэзалюцыя «атрымае значную колькасьць галасоў».
«Мяркую, што дзяржсакратар вельмі ўважліва паставіцца да разгляду [гэтага пытаньня]», — дадаў Рыш.
Дзярждэпартамэнт ЗША ўносіць у сьпіс краін-спонсараў тэрарызму дзяржавы, якія, на думку дзяржсакратара, неаднаразова надавалі падтрымку тэрарыстычным актам па ўсім сьвеце.
Санкцыі, якія накладаюць на такія дзяржавы, уключаюць у сябе абмежаваньні на атрыманьне дапамогі ад ЗША, забарону на экспарт і продаж прадукцыі абароннага прызначэньня, меры кантролю за экспартам тавараў падвойнага прызначэньня, розныя фінансавыя і іншыя абмежаваньні.
На гэты момант у сьпіс унесеныя чатыры дзяржавы: Куба, Паўночная Карэя, Іран і Сырыя.
Прадстаўляючы ў траўні дакумэнт рэзалюцыі, сэнатар Грэм сказаў:
«Пуцін — тэрарыст, і пуцінская Расея зьяўляецца адной з самых разбуральных сіл на плянэце. Пуцінская Расея заслугоўвае такога азначэньня... Мы таксама даем зразумець расейскаму народу, што мы змагаемся з Пуціным, і пакуль ён зьяўляецца вашым лідэрам, займаючыся падобнай дзейнасьцю, вы будзеце ізаляваныя на сусьветнай арэне».
Аналягічная двухпартыйная рэзалюцыя, у якой прапануецца прызнаць Расею дзяржавай-спонсарам тэрарызму, была ўнесена 12 траўня ў Камітэт па замежных справах Палаты прадстаўнікоў кангрэсменам-рэспубліканцам Джо Уілсанам і кангрэсменам-дэмакратам Тэдам Лью.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
