Урад ЗША стараўся трымаць у таямніцы ўсю інфармацыю пра паездку дзяржсакратара Энтані Блінкена і міністра абароны Лойда Осьціна, пакуль яны бясьпечна ня выехалі з Украіны, адмовіўшыся нават пацьвердзіць, што паездка адбылася, піша The New York Times.
Зрэшты, днём раней Уладзімір Зяленскі раскрыў пляны найвышэйшай дэлегацыі ЗША наведаць Украіну ўпершыню з моманту ўварваньня Расеі два месяцы таму. У інтэрвію, якое паказвалася па ўкраінскай тэлевізіі ў нядзелю, калі ўрад ЗША яшчэ захоўваў маўчаньне, дарадца Зяленскага Аляксей Арастовіч заявіў, што амэрыканцы ў Кіеве.
Што расказалі ў Кіеве
Прэзыдэнт Украіны Ўладзімір Зяленскі правёў сустрэчу зь дзяржаўным сакратаром ЗША Энтані Блінкенам і міністрам абароны ЗША Лойдам Остынам, якія прыбылі зь візытам ва Ўкраіну. Як паведамляе прэс-служба Офісу прэзыдэнта, у пачатку перамоваў Зяленскі адзначыў важнасьць наведваньня Кіева амэрыканскімі высокапастаўленымі чыноўнікамі «ў гэты адказны для Ўкраіны момант».
«Мы цэнім, што Злучаныя Штаты Амэрыкі беспрэцэдэнтна дапамагаюць Украіне. Хачу ад сябе асабіста і ад усяго ўкраінскага народу падзякаваць прэзыдэнту Байдэну за яго лідэрства ў падтрымцы Ўкраіны, за яго асабістую выразную пазыцыю. Падзякаваць усяму амэрыканскаму народу, а таксама Кангрэсу за двупалатную і двупартыйную падтрымку. Мы бачым гэта. Мы гэта адчуваем», – падкрэсьліў ён.
Зяленскі абмеркаваў з дэлегацыяй ЗША абаронную дапамогу, узмацненьне санкцый супраць Расіі, фінансавую падтрымку Украіны і гарантыі бясьпекі.
Прэзыдэнт Украіны адзначыў, што ўжо нададзеная Злучанымі Штатамі абаронная падтрымка на агульную суму 3,4 мільярда даляраў зьяўляецца найбольшым укладам ва ўмацаваньне абараназдольнасьці Ўкраіны.Паводле яго, гэтае спрыяньне ўжо дапамагае вывесьці абаронныя магчымасьці Ўкраіны на якасна новы ўзровень.
Амэрыканскі Кангрэс ужо мае зацьверджаны плян у 13,6 мільярда даляраў выдаткаў на надзвычайныя сытуацыі, зьвязаныя з расейскім уварваньнем, у тым ліку на зброю, вайсковыя пастаўкі ва Ўкраіну. Гэта адзін з самых вялікіх праектаў замежнай дапамогі ЗША якой-кольвек краіне за апошняе дзесяцігодзьдзе. Сродкі таксама пакрываюць разгортваньне войскаў ЗША ў Эўропе. За некалькі дзён да візыту амэрыканскіх палітыкаў у Кіеў прэзыдэнт Байдэн абвясьціў аб дадатковай вайсковай дапамозе ў памеры 800 мільёнаў даляраў, уключаючы абсталяваньне, прызначанае для таго, каб дапамагчы Ўкраіне адбіваць наступ Расеі на ўсходзе краіны.
Але вышэйшыя службовыя асобы ЗША не наведвалі краіну з моманту ўварваньня, нават калі эўрапейскія лідэры на гэта пайшлі, каб зь першых вуснаў пераканацца ў зьверствах, учыненых расейскімі салдатамі ў прыгарадах Кіева. Калі ўкраінцы адзначалі праваслаўны Вялікдзень, кіраўнік аўтакефальнай праваслаўнай царквы Украіны мітрапаліт Эпіфаній сустрэўся ў Кіеве з двума сябрамі Кангрэсу ЗША, Цімам Уолбэргам зь Мічыгану і Вікторыяй Спарц з Індыяны, абое прадстаўнікі Рэспубліканскай партыі.
Дзяржаўны сакратар ЗША Энтані Блінкен быў апошнім высокапастаўленым чыноўнікам ЗША, які наведаў Украіну ў сярэдзіне студзеня. Злучаныя Штаты закрылі амбасаду ў Кіеве 14 лютага, і іх дыпляматы неўзабаве пакінулі краіну. Ужо празь 10 дзён Расея пачала вайну.
Прэзыдэнт ЗША Джо Байдэн раней адмовіўся прыяжджаць непасрэдна ва Ўкраіну, але падчас свайго візыту ў Польшчу наведаў памежжа, дзе сустрэўся з украінскімі ўцекачамі.
Папярэднія візыты высокапастаўленых амэрыканскіх чыноўнікаў у іншыя зоны ваенных дзеяньняў, такія як Ірак і Афганістан, звычайна апісваліся толькі пасьля таго, як чыноўнік прыбыў у краіну — а часам нават пасьля таго, як зьехаў.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
