Лінкі ўнівэрсальнага доступу

У Гастомелі пад Кіевам 400 жыхароў зьніклі бязь вестак. Адсюль людзей вывозілі ў Беларусь


Пасьля баёў у Гастомелі, 3 сакавіка 2022 г.
Пасьля баёў у Гастомелі, 3 сакавіка 2022 г.

Кіраўнік Гастомельскай пасялковай вайсковай адміністрацыі Тарас Думенка заявіў, што пасьля сыходу расейскіх войскаў больш як 400 мясцовых жыхароў зьніклі бязь вестак.

«За 35 дзён акупацыі ў нас больш за 400 зьніклых бязь вестак. Падвалы Гастомеля мы цяпер аглядаем супольна з ратавальнікамі і супрацоўнікамі патрульнай паліцыі. У нас ёсьць каля 1200 жыхароў, сувязь зь якімі пацьверджаная і якія інфармуюць нас пра месцазнаходжаньне тых ці іншых людзей, якія выехалі», — паведаміў Тарас Думенка ў інтэрвію «Громадському радіо».

Паводле яго, у Гастомелі ня так шмат знайшлі целаў забітых.

«Але ў вёсках нашай грамады былі знойдзеныя расстраляныя і забітыя. Таксама некалькі жыхароў нашай грамады знайшлі ў Бучы. Трэба разумець, што акупанты перамяшчалі людзей. У нас ёсьць пацьверджаныя зьвесткі, што людзі з Глебаўкі былі ў Гастомелі, а потым зь імі зьнікала сувязь. Але патрэбна разумець, што акупанты таксама замяталі сьляды сваіх злачынстваў», — дадаў ён.

Тарас Думенка адзначыў, што ёсьць фота і відэа застрэленых людзей, але іхныя целы дагэтуль ня могуць знайсьці.

«Ты мог рухацца ў напрамку Гастомеля, і ўздоўж дарогі стаялі расстраляныя аўтамабілі зь целамі, уключна зь дзецьмі. І мог вяртацца назад — а гэтых целаў ужо не было», — удакладніў кіраўнік Гастомельскай вайсковай адміністрацыі.

Тарас Думенка дадаў, што расейцы забілі мэра Гастомеля Юрыя Прыліпку, валянтэраў Руслана Карпенку і Івана Зару, начальніка пажарнай службы Гастомельскага аэрапорту, але целаў гэтых людзей украінцы не знайшлі.

24 сакавіка кіраўнік Кіеўскай абласной дзяржаўнай адміністрацыі Аляксей Кулеба заявіў, што трэба дасьледаваць колькасьць украінцаў, прымусова вывезеных з Гастомеля ў Беларусь.

«Па Гастомелі нам яшчэ давядзецца вельмі доўга разьбірацца, бо там дагэтуль ёсьць, паводле нашых зьвестках, людзі, якіх не выпускаюць, і ў нас няма да іх доступу. Мы ня ведаем, якую колькасьць вывезьлі ў Беларусь, і не разумеем, чаму гэта зрабілі. У нас была інфармацыя, што іх грузілі ў аўтобусы і вывозілі ў Беларусь», — сказаў Аляксей Кулеба.

23 сакавіка Свабода пагутарыла з украінкай, якая трапіла з Гастомеля пад Гомель.

Гастомель перайшоў пад кантроль украінскіх войскаў у канцы сакавіка, калі расейскія войскі адступілі з Кіеўскай вобласьці.

Вайна Расеі супраць Украіны

  • А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
  • Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
  • Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
  • 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
  • З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
  • Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
  • 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
  • У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
  • 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
  • У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
  • Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
  • 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
  • 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
  • Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG