Пра гэта ішла размова ў час дакладу аб праекце ўказу аб органе дзяржаўнага кіраваньня ў сфэры лічбавага разьвіцьця і пытаньнях інфарматызацыі. Па словах Лукашэнкі, яму дакладваюць аб адтоку кадраў з ПВТ, яго цытуе прэс-служба.
«У свой час без усялякай моды стварылі Парк высокіх тэхналёгій. Ён сваю ролю адыграў і адыгрывае ў наш час. Я хачу, каб вы сёньня гэтую тэму закранулі і праінфармавалі мяне, што там адбываецца ў гэтым парку, наколькі там тэндэнцыя адтоку кадраў. Як мяне інфармуюць, такі ўжо там адток, што заўтра загіне Беларусь без айцішнікаў».
На гэтым фоне ён мае намер правесьці нараду і прыняць шэраг рашэньняў.
Раней адміністрацыя ПВТ зьбірала прапановы ад рэзыдэнтаў Парку аб мерах падтрымкі ў рамках супрацьдзеяньня санкцыям, а таксама зьвесткі аб праграмістах, якія выехалі з краіны. Паводле Лукашэнкі, трэба паглядзець на ад’езд праграмістаў з пункту гледжаньня бясьпекі.
«Працэс ад’езду некаторых айцішнікаў усё ж такі назіраецца, і, магчыма, ён немалы. Нам трэба паглядзець з пункту погляду бясьпекі, наколькі гэта небясьпечна для Беларусі. З другога пункту гледжаньня, трэба ўсё ж такі разабрацца з IT-тэхналёгіямі, IT-паркамі і з гэтымі айцішнікамі, каб у нас былі роўныя ўмовы для ўсіх. Час прыйшоў для таго, каб вырашаць гэтыя пытаньні», — сказаў ён.
