«На нашай зямлі пабывала канцэнтраванае зло, забойцы, каты, гвалтаўнікі, марадэры, якія называюць сябе арміяй і заслугоўваюць толькі сьмерці пасьля таго, што яны ўчынілі», — заявіў ён.
Перайшоўшы на расейскую мову, Зяленскі зьвярнуўся да маці расейскіх салдат:
«Нават калі вы гадавалі марадэраў, то як яны сталі яшчэ і катамі? Вы не маглі ня ведаць, што ўнутры ў вашых дзяцей, не маглі не заўважыць, што яны пазбаўлены ўсяго чалавечага, няма душы, няма сэрца. Яны забівалі сьвядома і з задавальненьнем. Я хачу, каб усё кіраўніцтва РФ убачыла, як выконваюцца іх загады: такія загады, такое выкананьне і салідарная адказнасьць... Вось так зараз будзе ўспрымацца ваша дзяржава. Гэта ваша выява. Ваша культура і чалавечая асоба загінулі разам з украінцамі і ўкраінкамі, да якіх вы прыйшлі».
Кіраўнік украінскай дзяржавы згадаў пра Бухарэсцкі саміт — 3 красавіка споўнілася 14 гадоў зь яго правядзеньня ў 2008 годзе. Зяленскі зьвярнуў увагу на неабходнасьць высноў аб «палітычных паводзінах, якія фактычна дазволілі гэтаму злу прыйсьці на нашу зямлю».
«Тады (у 2008 годзе) быў шанец забраць Украіну з шэрай зоны на ўсходзе Эўропы, з шэрай зоны паміж NATO і Расеяй, шэрай зоны, пра якую ў Маскве думаюць, што ім тут усё дазволена, нават самыя страшныя ваенныя злачынствы. За аптымістычнымі дыпляматычнымі фармулёўкамі аб тым, што Ўкраіна нібыта можа стаць сябрам NATO, тады ў 2008 годзе была схаваная адмова прымаць Украіну ў альянс», — сказаў Уладзімір Зяленскі.
Ён назваў гэтую адмову «ілжывым разьлікам» і зьвязаў яе з пачаткам расейскай агрэсіі ў 2014 годзе і поўнамаштабнай агрэсіяй у лютым 2022 году. Зяленскі згадаў тагачасных лідэраў Нямеччыны і Францыі — Ангелу Мэркель і Нікаля Сарказі.
«Я запрашаю спадарыню Мэркель, спадара Сарказі наведаць Бучу і ўбачыць, да чаго за 14 гадоў прывяла палітыка саступак Расеі. Убачыць на свае вочы закатаваных украінцаў і ўкраінак. Хачу, каб мяне зразумелі правільна: мы не абвінавачваем Захад, нікога, акрамя канкрэтных расейскіх вайскоўцаў, якія зрабілі гэта супраць нашых людзей і тых, хто аддаў ім загады. Але мы маем права казаць аб нерашучасьці, аб тым, якім быў шлях у такую Бучу, такі Гастомель, Харкаў, Марыюпаль. У нас няма нерашучасьці, у якім бы блёку і па-за блёкамі мы ні былі», — сказаў Зяленскі.
Вуліцы Бучы заваленыя целамі мірных жыхароў пасьля расейскай акупацыі — фотасьведчаньне
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- 17 лістапада Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
