Пра гэта піша Голас Амэрыкі.
Кіраўнік зьнешнепалітычнага ведамства ЗША падкрэсьліў, што асобы, вінаватыя ў ваенных злачынствах, павінны быць прыцягнуты да адказнасьці.
Камэнтары Блінкена прагучалі на наступны дзень пасьля таго, як украінскія войскі ўвайшлі ў горад Буча, разьмешчаны паблізу Кіева, і, як паведамілі афіцыйныя асобы і відавочцы, выявілі целы прыблізна 300 мірных жыхароў, забітых расейскімі вайскоўцамі. Дзяржсакратар агучыў сваю пазыцыю ў нядзельным інтэрвію тэлеканалу CNN.
«Мы ня можам не разглядаць гэтыя выявы інакш як (свайго роду) удар пад дых», — сказаў Блінкен. Ён адзначыў, што, як заявіла адміністрацыя Байдэна, яна лічыць, што расейскія войскі зрабілі (ва Ўкраіне) ваенныя злачынствы і Белы дом дапамагае зьбіраць наяўныя сьведчаньні гэтых злачынстваў.
«Неабходна прыцягнуць вінаватых да адказнасьці, — сказаў Блінкен. — І я думаю, што самае галоўнае — тое, што мы ня можам быць абыякавымі да таго, што адбылося... Гэта — рэальнасьць, гэта адбываецца кожны дзень, пакуль працягваюцца расейскія зьверствы ў адносінах да Ўкраіны».
Блінкен ня стаў адказваць на пытаньне, ці лічаць Злучаныя Штаты, што расейскія войскі зрабілі акт генацыду.
«Мы будзем старанна шукаць і дакумэнтаваць усё, што мы бачым. Зьбяром [факты] разам, каб гэта ўбачылі адпаведныя ўстановы і арганізацыі, у тым ліку Дзярждэпартамэнт», — сказаў ён.
У лік згаданых устаноў уваходзяць украінскія праваахоўныя органы і Міжнародны крымінальны суд, які расьсьледуе магчымыя ваенныя злачынствы і злачынствы супраць чалавецтва ва Украіне.
Блінкен адмовіўся пацьвердзіць паведамленьні аб тым, што ЗША садзейнічаюць перадачы танкаў савецкай эпохі ўкраінскім сілам ад усходнеэўрапейскіх саюзьнікаў. Аднак ён сказаў, што члены альянсу NATO працягваюць пастаўляць зброю «па ўсіх напрамках».
«Ва Ўкраіне ёсьць ці хутка будзе больш за 10 ПТРК (процітанкавых ракетных комплексаў) на кожны расейскі танк», — сказаў ён.
Блінкен прыме ўдзел у сустрэчы міністраў замежных спраў краін NATO 5-7 красавіка ў Брус’лі. Як заявіў афіцыйны прадстаўнік Дзярждэпартамэнту Нэд Прайс, падчас сустрэчы будзе абмяркоўвацца падтрымка альянсам Украіны.
Саюзнікі таксама разгледзяць «сумесныя намаганьні па прыцягненьню да адказнасьці прэзыдэнта РФ Пуціна і садзеяньні найхутчэйшаму спыненьню яго бессэнсоўнай і разбуральнай вайны супраць Украіны», — заявіў Прайс.
Паводле яго слоў, дзяржсакратар ЗША прыме ўдзел у сустрэчы міністраў замежных спраў G7 для дадатковых кансультацый.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- 17 лістапада Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
