Пра гэта заявіла прэсавая служба Міжнароднай фэдэрацыі плаваньня.
«У адпаведнасьці з рашэньнем бюро FINA ад 8 сакавіка 2022 году і новымі абставінамі па адхіленьні расейскіх і беларускіх спартоўцаў і афіцыйных асобаў ад спаборніцтваў FINA, а таксама пасьля разгляду незалежнай ацэнкі рызыкаў, бюро FINA правяло сёньняшняе пасяджэньне і пацьвердзіла, што спартоўцы і афіцыйныя асобы з Расеі і Беларусі ня возьмуць удзелу ў маючым адбыцца 19-м чэмпіянаце сьвету па водных відах спорту ў Будапэшце ў 2022 годзе», — гаворыцца ў афіцыйным паведамленьні FINA.
Асобна паведамляецца, што Дысцыплінарная калегія FINA распачала справу супраць расейскага плыўца Яўгена Рылова за патэнцыйнае парушэньне правілаў FINA пасьля ягонага ўдзелу ў праваенным мерапрыемстве на стадыёне «Лужнікі» ў Маскве. Выканаўчы камітэт FINA запатрабаваў паскорыць разгляд справы.
FINA выказала асуджэньне расейскага ўварваньня ва Ўкраіну і пацьвердзіла сваю падтрымку Фэдэрацыі плаваньня, скачкоў у ваду і мастацкага плаваньня Ўкраіны ў час падрыхтоўкі да будучых спаборніцтваў.
