У Кіеве ўсё часьцей гучыць паветраная трывога, але ўкраінская сталіца працягае ўмацоўваць сваю абарону. Першы намесьнік старшыні Кіеўскай гарадзкой дзяржаўнай адміністрацыі Мікола Паварозьнік заклікаў кіяўлян дакладна выконваць патрабаваньні на блёк-пастах.
«Для нашай бясьпекі нам патрэбныя блёк-пасты! Таму з разуменьнем стаўцеся да патрабаваньняў вайскоўцаў, паказвайце дакумэнты, паводзьце сябе спакойна. Гэта дазволіць пазьбегнуць канфліктных сытуацый», — сказаў Мікола Паварозьнік.
Баявыя дзеяньні і абстрэлы працягваюцца
Апошнія некалькі дзён узмацніліся баявыя дзеяньні ў так званым «залатым поясе» Кіева — пад Бучай, Барадзянкай, Кухарамі, Андрэеўкай, Матыжыным і Гарэнічамі.
Адначасова расейскія войскі спрабуюць прарвацца на Кіеў па чарнігаўскім і сумскім напрамках, пэрыядычна праводзячы, як сьцьвярджае Генэральны штаб Узброеных сіл Украіны, наступальныя апэрацыі, а на асобных участках нават часткова пасьпяхова.
Кіеў застаецца галоўнай мэтай расейскіх войскаў. Асобнымі нападамі на навакольныя паселішчы расейцы спрабуюць горад заблякаваць і адрэзаць яго ад галоўных крыніц забесьпячэньня цывільнага і вайсковага сэктару. Раніцай 12 сакавіка расейская артылерыя абстраляла два склады з харчовымі прадуктамі пад Браварамі, а зь іншага боку ўкраінскай сталіцы, у Васількове, зьнішчылі склад боепрыпасаў і нафтабазу.
Паветраная трывога
Раніцай у гістарычным цэнтры Кіева — на Падоле — ад бесьпілётніка з выбухоўкай загарэўся адміністрацыйны будынак. Яшчэ адзін пажар быў справакаваны ў іншым раёне ўкраінскай сталіцы, таксама ад боепрыпасу. Паводле папярэдніх зьвестак, ніхто не пацярпеў.
«Сямнаццатая раніца вайны», — напісала ў сваіх вайсковых хроніках беларуская журналістка Вераніка Бягун.
«Гучна было і ўвечары, і ўначы. І раніцай я прачнулася ад раскату. Шкада, што гэта дакладна не вясновы гром. Зіма працягваецца, і вайна працягваецца. Начныя маразы ў прагнозе яшчэ на тыдзень, і начны сон з пэрыядычнай сырэнай за вакном».
Эвакуацыя з прыгарадаў
На гэтым тле Кіеў працягвае дапамагаць з эвакуацыяй грамадзян з Ірпяня, Бучы, Гастомеля, Ворзеля і Немішаева. Пакуль што час камэнданцкай гадзіны застаецца ранейшы — з 20.00 да 7.00.
Напярэдадні дарадца Офіса прэзыдэнта Ўкраіны Міхаіл Падаляк заявіў, што Кіеў у аблозе, але горад гатовы змагацца.
«Абарону прадумалі. Забесьпячэньне наладзілі. Хлопцы на блёк-пастах зараджаныя, засяроджаныя і прафэсійныя. Палітычнае кіраўніцтва краіны ў поўным складзе на працоўных месцах у сталіцы Ўкраіны», — сказаў ён.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
