Беларусы сутыкаюцца з праблемамі пры пасадцы на цягнікі. Зьвесткі пасажыраў праваднікі перапісваюць уручную, некаторым выдаюць квіткі, запоўненыя ад рукі, піша «Наша ніва».
Жанчына, якая ехала сёньня цягніком Менск — Горадня, расказала, як праходзіла пасадка.
«Пры пасадцы людзей не маглі праверыць, бо ў праваднікоў не было электронных сьпісаў. Колькасьць пасажыраў, іх імёны — недаступныя. У мяне электронны квіток, мне пры пасадцы трэба толькі пашпарт паказаць. У гэты раз я паказала, мяне запісалі. Спыталі, якое ў мяне месца (раней, да ўзлому, мне самой яго называлі). Прыйшлося глядзець электронны квіток і назваць. Потым ужо да мяне падыходзілі і пыталіся нумар квітка».
Сам цягнік выехаў своечасова. Пра такія ж праблемы расказваюць і пасажыры, якія ехалі цягніком на Гомель.
Пра часовы брак у працаўнікоў БЧ электронных сьпісаў пасажыраў паведамілі і чытачы Свабоды. «Беларускую чыгунку, падобна, добра ўзламалі. Пры пасадцы запісвалі маё прозьвішча, ініцыялы і таксама нумар месца», — напісаў адзін з пасажыраў.
Паведамляюць таксама, што нельга аплаціць квіткі банкаўскай карткай.
На сайце чыгункі папярэджваюць, што купля і вяртаньне электронных квіткоў праз інтэрнэт часова недаступныя «з тэхнічных прычынаў». Гэта тычыцца цягнікоў з нумараванымі месцамі нацыянальных і міжнародных маршрутаў. Аформіць квіткі на іх можна ў касах.
У страйкаме «Нашай ніве» расказалі, што праз узлом пашкоджаная аўтаматычная сыстэма кіраваньня «Экспрэс», якая адказвае за квіткі.
Учора былі і іншыя паломкі.
«Не працавала дыспэтчарская цэнтралізацыя „Нёман“. Паўтары гадзіны былі сурʼёзныя праблемы з рухам — усе езьдзілі па тэлефонных указаньнях. Можна сказаць, чыгунка працавала на ручным кіраваньні», — дадаюць страйкамаўцы.
27 лютага паведамлялі пра хакерскую атаку на Беларускую чыгунку.
«Акцыі зьдзейсьненыя дзеля салідарнасьці з украінскім народам і з мэтай аказаньня яму дапамогі ў вайне супраць расейскага агрэсара. У выніку фізычна пашкоджаныя прылады сыгналізацыі, цэнтралізацыі і блякаваньня, а таксама кантактная сетка БЧ. Частка абсталяваньня не падлягае аднаўленьню. Паралізаваны рух на некалькіх участках дарогі», — заяўляла арганізацыя былых сілавікоў BYPOL.
