Вулічны пратэст у Менску працягваецца
Улады пачалі пагражаць крымінальнай адказнасьцю за пратэсты супраць вайны
Сьледчы камітэт Беларусі пачаў крымінальныя справы за «грубае парушэньне грамадзкага парадку, супраціў праваахоўнікам і заклікі да такіх дзеяньняў», паведамляе «Вясна».
«Цяпер затрыманыя больш за 10 арганізатараў, якія заклікалі да экстрэмісцкіх дзеяньняў. З падазраванымі працуюць сьледчыя. Іх дзеяньням дадзена праўная ацэнка», гаворыцца ў паведамленьні СК.
ЦВК: прагаласавалі ўжо 69,84% выбарнікаў
Цэнтравыбаркам апублікаваў афіцыйную інфармацыю ўладаў, згодна зь якой у рэфэрэндуме ўжо цяпер прынялі ўдзел 69,84% выбарнікаў.
- · Віцебская вобласьць — 74,91%
- · Магілёўская вобласьць — 74,04%
- · Берасьцейская вобласьць — 71,24%
- · Горадзенская вобласьць — 70,55%
- · Гомельская вобласьць — 70,52%
- · Менская вобласьць — 69,41%
- · Менск — 62,22%
Кабінкі-прыбіральні ў Познані. ФОТА
Пратэстуючы супраць таго, што ЦВК Беларусі нібыта праз каранавірусныя абмежаваньні (у Польшчы пераважна зьнятыя) не дазволіў адкрыць замежныя ўчасткі для галасаваньня, мясцовая беларуская дыяспара правяла «альтэрнатыўнае галасаваньне». Перш ва ўлётках на беларускай і польскай мовах растлумачылі сэнс падзеі, а затым паставілі кабінку ў выглядзе драўлянай вясковай прыбіральні ў чырвона-зялёных колерах.
Сілавікі перакрываюць праезд да Генэральнага штабу
У Менску перакрылі пад’езды да Генэральнага штабу на вуліцы Камуністычнай, 1. Улады спрабуюць перашкодзіць пратэстам супраць вайны ва Ўкраіне і ўдзелу ў ёй беларускіх вайскоўцаў.
«Слава Ўкраіне! Героям слава!» каля Генэральнага штабу ў Менску. ВІДЭА
Антываенны пратэст у Менску працягваецца. Людзі сабраліся каля будынку Генэральнага штабу, як заклікала Сьвятлана Ціханоўская, і пратэстуюць супраць расейскага ўварваньня ва Ўкраіну і ўдзелу ў ім Беларусі.
Пачаліся затрыманьні каля Генэральнага штабу
Каля будынку Генэральнага штабу ў Менску сілавікі пачалі затрымліваць удзельнікаў акцыі пратэсту супраць вайны. Агулам за дзень у Беларусі ўжо мінімум 66 затрыманьняў.
Галасаваньне ў Сьветлагорску. ВІДЭА
Вось так выглядае паход чальцоў камісіі па дамах для збору галасоў на поўдні краіны.
Хакеры «паклалі» сайт ЦВК
Перастаў адкрывацца сайт Цэнтравыбаркаму Беларусі. На 17:50 на сайт ЦВК і шэраг іншых сайтаў дзяржаўных структураў РБ няма доступу. Каля гадзіны ночы на сайце ЦВК мусілі публікаваць папярэднія вынікі рэфэрэндуму. Адказнасьць за блякаваньне сайту ўзялі на сябе ўкраінскія хакеры.
Колькасьць затрыманых вырасла да 88 чалавек
Як паведамілі праваабаронцы, на акцыях супраць вайны ва Ўкраіне і ўдзелу ў ёй беларусаў затрыманыя ўжо 88 чалавек, вядомыя іх імёны. Колькасьць удакладняецца, а затрыманьні працягваюцца. Яны прайшлі прынамсі ў 12 гарадах.
У Менску надалей затрымліваюць удзельнікаў антываеннай акцыі
Зьявілася відэа затрыманьняў у Менску каля Опэрнага тэатру. Людзі гукаюць «Не — вайне!» Некаторыя трымаюць украінскія сьцягі.
У Беларусі на рэфэрэндуме і акцыях пратэсту затрымалі ўжо 100 чалавек
Праваабаронцы складаюць сьпіс затрыманых у Беларусі падчас рэфэрэндуму і антываенных акцыях пратэсту. У сьпісе ўжо больш за 100 чалавек.
У пратэстах супраць вайны ва Ўкраіне ў дзень галасаваньня на рэфэрэндуме прынялі ўдзел каля 70 тысяч беларусаў па ўсім сьвеце
Пра гэта Свабодзе расказала Сьвятлана Ціханоўская.
На Нямізе ў Менску гудуць машыны, пратэстоўцы гукаюць „Не — вайне!“
У Беларусі працягваюцца антываенные пратэсты. Затрымалі ўжо больш за 110 чалавек.
У цэнтры Менску беларусы скандавалі «Пуцін — х*йло!»
У Менску працягваюцца антываенныя пратэсты. Беларусы гукаюць «Не — вайне!», «Слава Ўкраіне» і нават «Пуцін — х*йло!»
Колькасьць затрыманых у Беларусі падчас рэфэрэндуму і на акцыях пратэсту вырасла да 182 чалавек
Людзей затрымлівалі на ўчастках для галасаваньня, а таксама ў цэнтры Менску падчас антываенных акцыяў, на якія выйшлі людзі каля Генэральнага штабу і на Нямізе. «Вясна» складае сьпіс затрыманых.
«Жанчыны адбівалі затрыманых», — менчукі расказваюць, як схадзілі прагаласаваць на рэфэрэндуме
У Беларусі 27 лютага — асноўны дзень галасаваньня на рэфэрэндуме аб зьменах у Канстытуцыі. Многія жыхары краіны адгукнуліся на заклік лідэраў апазыцыі прыходзіць на ўчасткі а 14-й гадзіне. Пра свой досьвед удзелу ў рэфэрэндуме Свабодзе расказалі трое менчукоў.
У Гомлі затрымалі юрыстку, кандыдата навук Ірыну Кучвальскую
Яна прыйшла да выбарчага ўчастку ў школе нумар 66 з антываенным плякатам.
Ціханоўская заклікала працягнуць акцыі пратэсту 28 лютага
Сьвятлана Ціханоўская заклікала працягнуць акцыі пратэсту супраць вайны заўтра, 28 лютага, на прывакзальных плошчах гарадоў а 18-й гадзіне. Пра гэта яна заявіла на прэсавай канфэрэнцыі.
«Не — вайне!», «Слава Ўкраіне!» Як беларусы пратэставалі ў дзень рэфэрэндуму. ФОТА
Лякальныя акцыі пратэсту супраць расейскага ўварваньня ва Ўкраіну прайшлі 27 лютага ў Менску і розных гарадах Беларусі. Акцыі супалі з асноўным днём галасаваньня на рэфэрэндуме аб зьмяненьні Канстытуцыі, які мае на мэце яшчэ больш умацаваць уладу Аляксандра Лукашэнкі.
Напярэдадні дэмакратычны лідэр Сьвятлана Ціханоўская заклікала суграмадзян а 14-й гадзіне прыйсьці на выбарчыя ўчасткі і «актыўна выказаць пратэст супраць вайны».