Эўрапейскія лідэры асудзілі дзеяньні Расеі
Прэм’ер-міністар Вялікай Брытаніі Борыс Джонсан, якога цытуе BBC, заявіў, што ён з абурэньнем успрыняў «неабгрунтаваны напад» Расеі і што Брытанія «адкажа рашуча».
Прэмʼер-міністар Італіі Марыё Драгі назваў дзеяньні Расеі «неапраўданымі і неапраўдальнымі». «Мы працуем з саюзьнікамі па NATO, каб неадкладна адказаць, з адзінствам і рашучасьцю».
Тым часам прэсавы сакратар ураду Польшчы Пётр Мюлер заявіў, што прыйшоў «час узмацніць усходні флянг NATO» і дадаў: «Мы чакаем, што такія рашэньні будуць прынятыя».
Відэа заявы Пуціна аб пачатку вайны было запісана 21 лютага
Пра гэта сьведчаць мэтададзеныя файла з сайту Крамля.
Відэа Пуціна аб пачатку вайны, мяркуючы з мэтададзеных файла на сайце Крамля, было запісана не пазьней за вечар 21 лютага, на гэта зьвярнула ўвагу «Новая газета».
Адзеньне Пуціна супадае зь яго адзеньнем на пасяджэньні СБ РФ 21 лютага і на відэа аб прызнаньні ДНР і ЛНР.
Украінцы вярнулі Шчасьце
Цэнтар стратэгічных камунікацый і інфармацыйнай бясьпекі паведаміў, што ўкраінскія вайскоўцы вярнулі кантроль на горадам Шчасьце ў Луганскай вобласьці.
«Пры спробе нападу зьнішчылі тэхніку і забілі каля 50 ворагаў», — адзначаецца на афіцыйнай старонцы Цэнтру.
Генэральны сакратар ААН: Наступствы такой вайны немагчыма прадказаць
Генэральны сакратар ААН Антонію Гутэрыш асудзіў дзеяньні Расеі, заклікаўшы Пуціна «вярнуць вашыя войскі назад у Расею».
«У імя чалавечнасьці, не дазвольце пачацца вайне ў Эўропе, якая можа быць найгоршай вайной ад пачатку стагодзьдзя, з наступствамі ня толькі разбуральнымі, ня толькі трагічнымі для Расейскай Фэдэрацыі, але і з уплывам, які нават немагчыма прадказаць».
Нацыянальная паліцыя Ўкраіны пачынае выдаваць зброю вэтэранам-праваахоўнікам
Кіраўнік Нацыянальнай паліцыі Ўкраіны Ігар Кліменка падпісаў загад аб выдачы ва ўсіх абласных упраўленьнях зброі вэтэранам органаў унутраных спраў, гатовым стаць на абарону Ўкраіны.
«Укрзалізниця» паведаміла аб пачатку эвакуацыі грамадзян з усходу і поўдня Ўкраіны
У прыватнасьці, Украінская чыгунка паведаміла, што плянуюць цягнікі для эвакуацыі грамадзян са Сватава і Рубежнага, з Краматорску, Марыюпалю і Канстанцінаўкі. Таксама адзін эвакуацыйны рэйс плянуецца з Адэсы.
Гарыць вайсковы аэрадром у Чугуеве пад Харкавам
Захад 24 лютага экстрана склікае сустрэчы ў фарматах G7, NATO, ЭЗ для ціску на Расею
Прэзыдэнт ЗША Джозэф Байдэн сустрэнецца з саюзьнікамі па G7, каб намеціць жорсткія меры ў дачыненьні да РФ.
Кіраўнікі дзяржаў і ўрадаў краін ЭЗ абмяркуюць санкцыйны пакет у адносінах да Масквы на экстраным пасяджэньні. У Брусэлі заклікалі Расею неадкладна спыніць ваенную апэрацыю.
На надзвычайную нараду зьбяруцца сталыя прадстаўнікі пры NATO. Акрамя таго, брытанскі прэм’ер-міністар Борыс Джонсан склікае паседжаньне надзвычайнага ўрадавага камітэту Cobra.
Лукашэнка пачаў нараду зь сілавікамі
Нелегітымны кіраўнік Беларусі пачаў экстранную нараду зь сілавікамі. На пачатку ён падзякаваў усім удзельнікам і заявіў, што ніхто ня спаў гэтай ноччу.
«Беларускія войскі не бяруць ніякага ўдзелу ў расейскай спэцапэрацыі на Данбасе», цытуе яго БелТА.
Рада БНР: Ад посьпеху Ўкраіны ў адбіцьці агрэсіі будзе залежаць і будучыня Беларусі
Рада Беларускай Народнай Рэспублікі выступіла з заявай, у якой асудзіла «збройную агрэсію Расейскай Фэдэрацыі супраць Украіны і спрыяньне гэтай агрэсіі з боку нелегітымнай дзяржаўнай улады Аляксандра Лукашэнкі ў Рэспублікі Беларусь».
Рада папярэдзіла афіцыйных асобаў Рэспублікі Беларусь «пра адказнасьць за магчымае ўцягваньне Беларусі ў вайну, а таксама за падтрымку ці спрыяньне збройнай агрэсіі Расейскай Фэдэрацыі» і заклікала міжнародную супольнасьць «да цьвёрдай пазыцыі адносна як кіраўніцтва дзяржавы-ініцыятара агрэсіі, так і нелегітымнага рэжыму Аляксандра Лукашэнкі ў Беларусі».
Вынікі апытаньня: Беларусы супраць таго, каб Беларусь падтрымлівала Крэмль у вайне супраць Украіны
Паводле дасьледаваньня Chatham House, пра якое паведаміла DW, большасьць беларусаў выказалася за тое, каб Менск заняў нэўтральную пазыцыю ў вайне. Так адказалі 56% рэспандэнтаў.
57% мяркуюць, што ўдзел у вайне будзе мець катастрафічныя наступствы для краіны. 79% удзельнікаў апытаньня не жадаюць, каб беларускія салдаты тэрміновай службы ўдзельнічалі ў вайне паміж Расеяй і Ўкраінай. Апытаньне праводзілася ў пачатку лютага 2022 году.
Беларуская амбасада ў Кіеве маўчыць
Беларускае пасольства ва Ўкраіне не адказвае на тэлефонныя званкі па нумары, прызначаным «толькі для грамадзян Рэспублікі Беларусь, якія апынуліся на тэрыторыі Украіны ў надзвычайнай сытуацыі». Пра гэта паведамляе «Наша ніва».
Выданьне зазначае, што на гэты момант па нумарах пасольства ніяк немагчыма дазваніцца ці проста ніхто не бярэ трубку.
Пасольства таксама не дае ніякай інфармацыі, што, напрыклад, рабіць беларусам у сытуацыі бамбаваньня ўкраінскіх гарадоў Расеяй. Няма ніякай інфармацыі, прысьвечанай сытуацыі ва Ўкраіне і на афіцыйным сайце Міністэрства замежных спраў Беларусі.
МЗС Беларусі рэкамэндаваў беларусам устрымацца ад паездак ва Ўкраіну
Заява зьявілася на сайце МЗС:
«У сувязі з разьвіцьцём сытуацыі ва Ўкраіне Міністэрства замежных спраў Рэспублікі Беларусь настойліва рэкамэндуе беларускім грамадзянам адмяніць пляны наведваньня гэтай краіны да стабілізацыі абстаноўкі».
Украінцы заявілі, што зьнішчылі шосты самалёт акупантаў
Паблізу Краматорску Ўзброеныя сілы Ўкраіны зьнішчылі шосты ад пачатку баявых дзеяньняў самалёт расейскіх вайскоўцаў. Перад тым самалёт парушыў дзяржаўную мяжу Ўкраіны, піша Укрінформ.
Расейскае Мінабароны папярэднія паведамленні аб зьбітых самалётах абвяргала.
Лукашэнка паведаміў, што сам папрасіў Пуціна пакінуць войскі ў Беларусі
«Каб не было інсінуацый: падчас апошняй сустрэчы ў Маскве я асабіста прапанаваў Пуціну пакінуць некаторую колькасьць Узброеных сіл Расейскай Федэрацыі на поўдні нашай Беларусі. Чаму? Мне ня сорамна пра гэта сказаць: мы не былі гатовыя прыкрыць паўднёвы кірунак у дадзенай сытуацыі, паколькі ўкраінскія падраздзяленьні — вайсковыя, не памежныя — высунуліся да мяжы і пачалі праводзіць там манэўры. Мы гэта бачылі, але ў нас там ніколі не было войскаў. Таму я прапанаваў нейкую невялікую частку [расейскіх войскаў] пакінуць там, на паўднёвых межах, пакуль мы сваімі Узброенымі сіламі не заменім іх».
Першыя фота нападу Расеі на Ўкраіну
Расея напала на Ўкраіну. Першыя фатаздымкі
Расейцы пагражаюць захапіць Зьмяіны. АЎДЫЁ
Невядомыя асобы, якія відавочна належаць боку агрэсараў, пагражаюць узяцьцем вострава Зьмяіны. Украінскія памежнікі занялі абарону.
«Акупанты пагражаюць запатрабаваць капітуляцыі ізмаільскіх памежных войскаў. Для бясьпекі суднаходзтва агрэсар выкарыстаў міжнародны канал сувязі».
Востраў Зьмяіны месьціцца ў Чорным моры за 120 км ад Адэсы, паблізу ад мяжы з Румыніяй.
Антываенны мітынг у Ерэване
Журналіст Идель.Реалии Радыё Свабода паведамляе, што ў сталіцы Армэніі людзі выйшлі пратэставаць супраць уварваньня расейскага войска ва Ўкраіну. Ладзіць мітынг Эўрапейская партыя Армэніі.
Амбасадар Украіны ў Беларусі абверг інфармацыю пра атаку з боку Беларусі
Ігар Кізім лічыць, што любая прысутнасьць расейскіх войскаў дзе-кольвек вядзе да вайны. У Беларусі іх сканцэнтравана вельмі шмат.
Кіеў: Верталёт без апазнавальных знакаў з боку Беларусі абстраляў украінскі пункт пропуску
Украінскія памежнікі паведамілі, што ў 9:40 з боку Беларусі верталёт без апазнавальных знакаў абстраляў мост па абодва бакі перад пунктам пропуску «Славуціч» (на мяжы Ўкраіны і Беларусі).
З пачатку абстрэлаў тэрыторыі Ўкраіны Расеяй загінулі пяць украінскіх памежнікаў. Агульная колькасьць пацярпелых сярод вайскоцаў і цывільных невядомая. Пацьверджэньня гэтай інфармацыі зь беларускага і расейскага боку няма.