Эўразійскі фонд стабілізацыі і разьвіцьця адмовіў Беларусі ў крэдыце ў 3,5 мільярда даляраў. Гэтую суму Беларусь папрасіла ў сьнежні для рэфінансаваньня свайго доўгу ў сувязі з адсутнасьцю дапамогі ад эўрапейскіх фондаў.
Расейскі міністар Сілуанаў заявіў толькі, што «Расея была б гатовая рэфінансаваць сёлета доўг Беларусі перад Масквой і ЭФСР у памеры 1 мільярда даляраў».
Колькі даўгоў Беларусь мусіць аддаць сёлета
- 10 мільярдаў рублёў — столькі Беларусь мусіць выплаціць па даўгах сёлета, паводле Міністэрства фінансаў. Гэта 3,9 мільярда даляраў. Ліміт доўгу не павінен перавышаць 40% ВУП.
- Найбольшая частка сродкаў пойдзе на пагашэньне доўгу Расеі — 3,3 млрд рублёў, або 1,3 мільярда даляраў.
- Агулам дзярждоўг Беларусі складае 18,2 млрд даляраў па стане на 1 студзеня 2022 году.
Расея адмовіла ў крэдыце, бо напружыліся адносіны?
На думку былога дыплямата Паўла Мацукевіча, Расея ня будзе адмаўляць Беларусі ў дапамозе, але гэтая дапамога будзе проста для «падтрыманьня штаноў».
«Відавочна, што цягам 1,5 года, колькі цягнецца палітычны крызіс у Беларусі, Расея не адмаўляе Лукашэнку ў дапамозе: ні ў крэдытах, ні ў іншым.
Аднак Лукашэнка не атрымлівае той фінансавай дапамогі, якой бы ён хацеў. Паколькі альтэрнатывы ніякай няма, то даводзіцца пагаджацца і прымаць тое, што даюць. Безумоўна, гэта форма ціску, Расея знаходзіцца ў выгадным становішчы, калі можа праз саму магчымасьць адмовы маніпуляваць сваім саюзьнікам», — кажа Павал Мацукевіч.
Ён дадае, што адмова ад выдачы крэдыту на 3,5 мільярда даляраў прагучала ад міністра фінансаў Сілуанава, а Пуцін можа пасьля сказаць іншае.
«Лукашэнка шматкроць казаў аб крэдыце ў 3 мільярды, якія нібыта ўдалося зэканоміць пры будаўніцтве АЭС, Пуцін пакуль маўчыць пра гэта. Грошы ня можа даць Эўразійскі фонд, сказаў Сілуанаў, але сама Расея ў дапамозе адмаўляць ня будзе», — мяркуе Павал Мацукевіч.
Ці абыдзецца Беларусь без 3,5-мільярднага крэдыту?
Паводле эканаміста Яраслава Раманчука, грошай у Беларусі, каб разьлічыцца з даўгамі, хопіць нават без крэдытаў. На гэта ёсьць грошы зь бюджэту і з золатавалютных рэзэрваў.
«З крэдытамі яны ўсё адно дамовяцца. Гэта спробы вытаргаваць нешта, і крытычнай сытуацыі тут няма. Расея і Кітай дадуць грошай. Калі на гэтым можна зарабіць 8–9% у валюце — ахвотных будзе шмат. Яшчэ пару гадоў можна працаваць на даўгі, але пасьля будзе балюча, пра гэта ніхто ня думае», — кажа Яраслаў Раманчук.
У бюджэце Беларусі на 2022 год прапісаныя крэдыты ад міжнародных фінансавых арганізацый на 2 мільярды рублёў і крэдыты ад замежных дзяржаў на 586 мільёнаў рублёў.
У суме гэта менш за 1 мільярд даляраў. Якраз пра такую суму рэфінансаваньня доўгу Беларусі казаў міністар фінансаў Расеі Сілуанаў.
