Ведамства сьцьвярджае, што імі былі атрыманыя «зьвесткі аб стыхійных агульных безназоўных магілах, сфармаваных вымушана па-за спэцыяльна адведзенымі для гэтага месцамі ў сувязі з баявымі дзеяньнямі».
«У жніўні — кастрычніку 2021 году ў раёне гораду Сьнежнае, пасёлку Славянасербск, у раёне жылога масіву Сакалароўка гораду Першамайску, пасёлку Віднае-1 недалёка ад Луганску і на ўскраіне вёскі Верхнешавыраўка Краснадонскага раёну выяўленыя 5 стыхійных масавых пахаваньняў. Зь іх эксгумаваныя парэшткі ня менш як 296 цывільных асобаў, якія загінулі ў выніку нявыбарачных абстрэлаў з боку ўкраінскіх узброеных фармаваньняў у 2014 годзе», — цытуе паведамленьне «Настоящее время».
З красавіка 2014 году, як гаворыцца ў прэс-рэлізе, «прадстаўнікі ўкраінскіх сілавых структураў пастаянна вядуць абстрэлы населеных пунктаў Данбасу, прымяняючы сьмяротнае ўзбраеньне нявыбарчага дзеяньня, прызначанае для максымальна эфэктыўнага зьнішчэньня людзей і інфраструктуры».
«Вынікам гэтага стала ня толькі разбурэньне жылых дамоў і аб’ектаў забесьпячэньня жыцьцядзейнасьці, але і гібель і раненьні тысячаў мірных жыхароў, рускамоўных групаў, якія ня ўдзельнічаюць у ваенным канфлікце», — заявілі ў Сьледчым камітэце Расеі.
Днём раней прэзыдэнт Расеі Ўладзімір Пуцін па выніках перамоваў з канцлерам Нямеччыны Олафам Шольцам пракамэнтаваў падзеі ва Ўкраіне і зьвярнуў увагу на падзеі ў Югаславіі. «Гэта вельмі дрэнны прыклад. Але ён быў», — цытуе словы Пуціна РБК. Ён таксама заявіў, што Расея не жадае паўтарэньня гэтай сытуацыі.
Олаф Шольц у адказ заявіў, што «ў Югаславіі некалькі іншая сытуацыя панавала, там была небясьпека і пагроза генацыду». Паводле слоў канцлера, у Югаславіі за кошт апэрацыі NATO ўдалося перашкодзіць гэтай пагрозе, і цяпер «там усё мірна разьвіваецца» і народы Балкан знайшлі пэрспэктыву ў напрамку ЭЗ.
«Па нашых ацэнках, тое, што адбываецца на Данбасе сёньня, — гэта і ёсьць генацыд», — сказаў Пуцін пасьля слоў Шольца.
