DER SPIEGEL стала вядома, што BND перахапіла расейскія вайсковыя радыёперамовы, у якіх абмяркоўвалася забойства мірных жыхароў у Бучы. Некаторыя зь перахопленых радыёперамоваў, відаць, могуць быць непасрэдна зьвязаныя з трупамі, якія былі сфатаграфаваныя ў Бучы.
Пасьля вываду расейскіх войскаў з горада ў мінулыя выхадныя было знойдзена масавае пахаваньне, а таксама целы некалькіх дзясяткаў загінулых мірных жыхароў, пакінутыя ляжаць на вуліцах. Рукі некаторых ахвяр былі зьвязаныя, а на целах іншых былі сьляды катаваньняў. Паведамляецца, што сярод ахвяр таксама шмат жанчын і дзяцей.
Расейскі ўрад катэгарычна адмаўляе, што расейскія войскі нясуць адказнасьць за гэтыя ваенныя злачынствы.
Перахопленыя нямецкай выведкай камэнтары сьведчаць пра адваротнае.
Як стала вядома DER SPIEGEL, у сераду BND паінфармавала парлямэнтароў аб сваіх высновах.
Частка перахопленага трафіку адпавядае ранейшым зьвесткам аб месцазнаходжаньні цел, знойдзеных уздоўж галоўнай дарогі праз горад. У адным з аўдыё салдатаў нібыта сказаў другому, што яны толькі што застрэлілі чалавека на ровары. Гэта адпавядае вядомаму цяпер па ўсім сьвеце фатаздымку мёртвага цела, якое ляжыць побач з роварам. У іншай перахопленай размове мужчына нібыта сказаў: «Спачатку ты дапытваеш салдатаў, а потым страляеш у іх».
Частка пляну?
Матэрыял BND таксама нібыта сьведчыць пра тое, што вядучую ролю ў зьверствах адыгрывалі баевікі расейскага наёмнага падразьдзяленьня пад назвай ПВК «Вагнэр». Вядома, што група зьдзяйсьняла аналягічныя злачынствы ў Сырыі.
Відавочцы нядаўна паведамілі, што акупацыйныя сілы ў Бучы першапачаткова складаліся з «маладых салдатаў». Пасьля таго, як іх зьмянілі іншыя падразьдзяленьні, па словах відавочцаў, напады на мірных жыхароў сталі адбывацца часьцей. Некаторыя відавочцы паведамляюць, што ў горадзе знаходзіліся чачэнскія падразьдзяленьні. Справаздачы падымаюць пытаньне аб тым, ці было гэтае прасоўваньне часткай пляну акупацыі.
Як піша DER SPIEGEL, радыёперамовы, перахопленыя BND, ствараюць уражаньне, што зьверствы, учыненыя над мірнымі жыхарамі ў Бучы, не былі выпадковымі дзеяньнямі асобных салдатаў, якія выйшлі з-пад кантролю. Хутчэй, гавораць крыніцы, якія пазнаёміліся з аўдыёзапісам, што вайскоўцы гаварылі аб зьверствах так, як быццам яны проста абмяркоўвалі сваё паўсядзённае жыцьцё.
Таксама крыніцы выданьня кажуць, што забойствы мірных жыхароў сталі стандартным элемэнтам расейскай ваеннай дзейнасьці, а магчыма, нават часткай шырэйшай стратэгіі. Намер складаецца ў тым, каб пасеяць страх сярод цывільнага насельніцтва і тым самым аслабіць волю да супраціву.
DER SPIEGEL даведаўся, што ў цяперашні час аналізуецца больш перахопленых радыёперамоваў, аднак цяжка дакладна лякалізаваць частку гуку. Некаторыя запісы ўказваюць на тое, што інцыдэнты, падобныя тым, што адбыліся ў Бучы, мелі месца і ў іншых месцах. Паведамляецца, што ёсьць прыкметы магчымых зьверстваў у навакольлях Марыюпалю, буйнога горада на поўдні Ўкраіны, абложанага расейскімі вайскоўцамі.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
