У падрыхтоўцы такой вайны ён абвінаваціў кіраўніцтва Расеі і асабіста прэзыдэнта Уладзіміра Пуціна, якога заклікаў пайсьці ў адстаўку.
Зварот датаваны 31 студзеня. Напярэдадні на яго зьвярнуў увагу палітоляг Іван Праабражэнскі, а потым іншыя камэнтатары ў інтэрнэце.
Генэрал Івашоў вядомы сваімі прасавецкімі і нацыянал-патрыятычнымі поглядамі.
На думку Івашова, «раней Расея (СССР) вяла вымушаныя (справядлівыя) войны, і, як правіла, калі іншага выйсьця не заставалася, калі жыцьцёва важныя інтарэсы дзяржавы і грамадзтва аказваліся пад пагрозай». Аднак цяпер, як піша генэрал, адзінай пагрозай існаваньня Расеі зьяўляецца дэградацыя яе ўнутранага жыцьця. Вонкавыя ж пагрозы «не зьяўляюцца ў дадзены момант крытычнымі». «Захоўваецца ў цэлым стратэгічная стабільнасьць, ядзерная зброя знаходзіцца пад надзейным кантролем, групоўкі сіл NATO не нарошчваюцца, пагрозьлівай актыўнасьці не праяўляюць», — піша Івашоў.
Як гаворыцца ў звароце, Украіна як незалежная дзяржава мае права на індывідуальную і калектыўную абарону. «Натуральна, для таго, каб Украіна засталася дружалюбным суседам для Расеі, неабходна было для яе прадэманстраваць прывабнасьць расейскай мадэлі дзяржавы і сыстэмы ўлады», — піша Івашоў. Ён таксама зазначае, што пераважная большасьць дзяржаў сьвету не прызнае анэксаванага Крыму і Севастопаля расейскімі, што «пераканаўча паказвае няслушнасьць і непераканаўчасьць расейскай замежнай палітыкі і непрывабнасьць унутранай».
На думку генэрала, прымяненьне вайсковай сілы супраць Украіны «па-першае, паставіць пад пытаньне існаваньне самой Расеі як дзяржавы; па-другое, назаўжды зробіць расейцаў і ўкраінцаў сьмяротнымі ворагамі». Івашоў таксама баіцца ўступленьня ў канфлікт краін NATO, у прыватнасьці Турэччыны.
«Акрамя таго, Расея адназначна будзе занесеная ў катэгорыю краін, якія пагражаюць міру і міжнароднай бясьпецы, абкладзена найцяжэйшымі санкцыямі, ператворыцца ў ізгоя сусьветнай супольнасьці, і, верагодна, будзе пазбаўлена статусу незалежнай дзяржавы», — мяркуе генэрал. Ён лічыць, што Расея «правакуе напружанасьць на мяжы вайны», каб адцягнуць насельніцтва ад унутраных праблем.
У звароце зьмяшчаецца патрабаваньне да прэзыдэнта «адмовіцца ад злачыннай палітыкі правакаваньня вайны».
- Леанід Івашоў у 1996–2001 гадах быў начальнікам Галоўнага ўпраўленьня міжнароднага вайсковага супрацоўніцтва Міністэрства абароны Расеі, займаў іншыя высокія пасады ў Міністэрстве абароны. Ён атрымаў вядомасьць, у прыватнасьці, рэзка нэгатыўнымі ацэнкамі апэрацыі NATO супраць Сэрбіі ў 1999 годзе. Пасьля адстаўкі выступаў у газэце «Завтра» і ў іншых СМІ з крытыкай палітыкі расейскіх уладаў з «нацыянальна-дзяржаўных» пазыцый. Крытыкаваў таксама NATO і Захад.
- «Агульнарасійскі афіцэрскі сход» — грамадзкая арганізацыя, якая аб’ядноўвае афіцэраў запасу прасавецкіх і нацыянал-патрыятычных поглядаў, у яе кіраўніцтва ўваходзіць, напрыклад, палкоўнік Уладзімір Квачкоў і іншыя вядомыя асобы.
Пагроза нападу Расеі на Ўкраіну
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- 17 лістапада Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
