Баранавіцкі, Бярозаўскі, Ганцавіцкі, Івацэвіцкі, Ляхавіцкі, Пінскі ды астатнія гарадзкія і раённыя выканкамы ў разьдзелах беларускамоўнай вэрсіі ўсю інфармацыю падаюць па-расейску. Адпаведна, немагчыма даслаць зварот як у беларускамоўнай, так і ў расейскамоўнай вэрсіі сайту: тэкст з праверачнага малюнка не адлюстроўваецца.
«Адсутнасьць беларускай мовы на сайтах дзяржаўных установаў — гэта грубае парушэньне заканадаўства і правоў чалавека, — канстатуе юрыст Ігар Случак. — Таму неабходна абараняць свае правы (і моўныя, і іншыя), бо інакш ніякіх правоў у нас не застанецца. Варта патрабаваць выкананьня заканадаўства праз звароты і заявы. Людзі сваімі актыўнымі або пасіўнымі паводзінамі вызначаюць будучыню».
Адпаведны прыклад мусіць падаваць кіраўніцтва вэртыкалі, аднак зьмест сайту Берасьцейскага аблвыканкаму ў фармальна наяўнай беларускамоўнай вэрсіі скрозь па-расейску. Зрэшты, ня выключаныя станоўчыя зьмены.
Прынамсі ў адказе на імя Ігара Случака намесьнік старшыні абласной адміністрацыі Генадзь Барысюк запэўніў, што «тэхнічнае заданьне дзяржаўнай закупкі паслугаў на бягучы год» прадугледжвае беларускамоўныя вэрсіі сайтаў выканаўчых камітэтаў усіх узроўняў.
