Інфармацыя аб прызначэньні даты прысуду зьявілася 24 лістапада. Яе пацьвердзіла Дар’я Лосік, жонка журналіста-палітвязьня, якая цягам усяго працэсу знаходзілася побач з будынкам гомельскага СІЗА-3.
«Так, прысуд сапраўды прызначылі на 14 сьнежня, — расказала Дар’я Лосік. — Усё, як паведаміла Марына Адамовіч, так і ёсьць. Як я разумею, і сам працэс, і спрэчкі бакоў ужо скончыліся. Раз прызначылі дату абвяшчэньня прысуду, можна меркаваць, што працэс скончыўся».
Суд праходзіў у закрытым рэжыме, пра яго амаль нічога невядома. У разглядзе справы было некалькі перапынкаў, таксама падчас працэсу зьмяніўся судзьдзя. Вядома, што на трэці дзень суду, яшчэ ў чэрвені, з залі да канца разгляду справы быў выдалены Мікола Статкевіч. Яго мусілі вярнуць для ўдзелу ў спрэчках бакоў, даць права прамовіць апошняе слова.
Родных абвінавачаных, у тым ліку Дар’ю Лосік, на працэс не пусьцілі, нягледзячы на просьбы і заявы. У першыя дні суду на ім прысутнічалі супрацоўнікі дзяржаўных СМІ.
Як расказала Свабодзе Дар’я Лосік, яна яшчэ спадзяецца трапіць на абвяшчэньне прысуду.
«Сёньня я чарговы раз была ў Гомельскім абласным судзе, падала там заяву аб тым, што хачу прысутнічаць на абвяшчэньні рэзаляцыйнай часткі прысуду Ігару, — гаворыць Дар’я. — Вельмі спадзяюся, што траплю на яе. Вельмі хочацца паглядзець на мужа. Ведаю, што Марына Адамовіч таксама падавала такое прашэньне. Наконт астатніх родных абвінавачаных у справе Ігара я не магу нічога сказаць, ня ведаю».
Працэс у справе Ігара Лосіка, Сяргея Ціханоўскага, Міколы Статкевіча і іншых абвінавачаных ішоў амаль пяць месяцаў. Усе яны былі затрыманыя ў канцы траўня — чэрвені 2020 году, задоўга да дня правядзеньня прэзыдэнцкіх выбараў. Адвакаты ўсіх абвінавачаных далі падпіску аб невыдаваньні матэрыялаў спраў сваіх падабаронных і нават дэталяў працэсу, у выніку невядомыя нават усе артыкулы Крымінальнага кодэксу, паводле якіх абвінавацілі Ігара Лосіка. Яго жонка Дар’я мяркуе, што мяккага прысуду чакаць ня варта.
«Калі мяне ня пусьцяць на абвяшчэньне прысуду, я ўсё адно паеду ў Гомель, — гаворыць Дар’я Лосік. — Я буду там у любым выпадку. Я не разьлічваю на мяккі прысуд. Рэжым не адпускае людзей проста так. Не прызнае сваіх памылак. Таму я думаю, што вырак будзе дастаткова жорсткім. Гэта маё бачаньне ўсяго. На гэты момант яно даволі сумнае».
Журналіста Радыё Свабода Ігара Лосіка затрымалі дома ў Баранавічах 25 чэрвеня 2020 году. Суд у ягонай справе пачаўся толькі праз год. Дакладна вядомыя два артыкулы абвінавачаньня з трох («удзел у масавых беспарадках» і «арганізацыя альбо падрыхтоўка дзеяньняў, якія груба парушаюць грамадзкі парадак»).
На знак нязгоды ён двойчы абвяшчаў галадоўкі, адна зь іх працягвалася 42 дні. Пасля выстаўленьня абвінавачаньняў паводле трэцяга артыкулу ў сакавіку 2021 году Ігар Лосік на вачах у сьледчага і адваката пашкодзіў сабе вены на руцэ. Палітвязьнем яго прызналі ў канцы чэрвеня 2020 году.
За кратамі Ігар Лосік знаходзіцца 518 дзён.
Крымінальны перасьлед Ігара Лосіка
На журналіста Радыё Свабода і блогера Ігара Лосіка ў 2020 годзе завялі крымінальныя справы паводле ч. 1 арт. 342 Крымінальнага кодэксу («падрыхтоўка да парушэньня грамадзкага парадку») і ч. 2 арт. 293 («падрыхтоўка да ўдзелу ў масавых беспарадках»).
Лосіка затрымалі 25 чэрвеня 2020 году пасьля ператрусу дома ў Баранавічах. На ягоны тэлеграм-канал «РБ головного мозга» ў той момант былі падпісаныя 167 тысяч чалавек.
Ігар Лосік актыўна асьвятляў падзеі выбараў прэзыдэнта Беларусі. Праваабаронцы прызналі яго палітвязьнем.
15 сьнежня 2020 году, пасьля выстаўленьня другога абвінавачаньня, Ігар Лосік абвясьціў галадоўку пратэсту і трымаў яе да 25 студзеня 2021 году.
11 сакавіка 2021 году Лосіку выставілі новае абвінавачаньне. На знак пратэсту Ігар пашкодзіў сабе запясьце на вачах у адваката і сьледчага, а таксама абвясьціў сухую галадоўку. За гэта Лосіка зьмясьцілі ў карцар сьледчай турмы Жодзіна. Там ён прабыў пяць дзён, чатыры зь якіх трымаў сухую галадоўку.
- 14 сьнежня 2021 году ў будынку СІЗА-3 ў Гомлі судзьдзя Мікалай Доля прысудзіў Ігару Лосіку 15 гадоў зьняволеньня. Яго прызналі вінаватым паводле двух артыкулаў Крымінальнага кодэксу — «Распальваньне сацыяльнай варажнечы і непрыязі ў адносінах да прадстаўнікоў улады і праваахоўных органаў, учыненае групай асобаў» (ч.3 арт.130) і «Арганізацыя масавых беспарадкаў, якія суправаджаліся пагромамі падпаламі, зьнішчэньнем маёмасьці і ўзброеным супрацівам прадстаўнікам улады» (ч.1 ст.293).
- Жонку Ігара Лосіка Дар’ю пакаралі 2 гадамі зьняволеньня ў калёніі агульнага рэжыму (паводле арт. 361-4 Крымінальнага кодэксу, «Садзейнічаньне экстрэмісцкай дзейнасьці») за інтэрвію пра мужа, у якім яна, паводле абвінавачаньня, «пазыцыянавала сябе як жонка палітвязьня». Прысуд Дар’і Лосік вынес 19 студзеня 2023 году судзьдзя Берасьцейскага абласнога суду Мікалай Грыгаровіч.
