У нядаўняй публікацыі ў аўтарытэтным нямецкім выданьні Der Spiegel сьцьвярджалася, што «ЦэнтарКурорт» — адна зь фірмаў, якая каардынуе паток нелегальных мігрантаў на Захад. У расьсьледаваньні Der Spiegel гаварылася, што праз «ЦэнтарКурорт» прайшло больш за 200 заявак на візы для грамадзян Іраку, а разьмяшчаліся яны ў сталічных гатэлях «Менск» і «Беларусь».
Камэнтуючы публікацыю агенцтву Sputnik, турыстычная кампанія пацьвердзіла, што «ЦэнтарКурорт» сапраўды працуе з кліентамі з краін Блізкага Ўсходу і Паўднёва-Ўсходняй Азіі, у тым ліку і з Іраку. Але супрацоўнічае «толькі з тымі замежнымі кампаніямі, якія рэкамэндаваныя беларускім МЗС» і толькі з багатымі кліентамі.
«Усе гэтыя гады мы працуем зь фінансава забясьпечанымі кліентамі з арабскіх краін, прадаючы ім турпакеты дарагога сэгмэнту разьмяшчэньня (ня менш як чатыры зоркі) з насычанай турыстычнай праграмай і стоадсоткавай перадаплатай. Усе гэтыя меры выключаюць трапляньне ў склад груп патэнцыйных парушальнікаў мяжы», — заявілі ў кампаніі.
У кампаніі «ЦэнтарКурорт» адзначылі, што не было зафіксавана ніводнага выпадку, каб іх кліентаў затрымлівалі пры спробе прарвацца праз мяжу. Усе турысты, зь якімі працаваў турапэратар, уключаючы грамадзян Іраку, «выдатна правялі час у Беларусі і шчасьліва вярнуліся на сваю гістарычную радзіму».
Цяпер, паводле прадстаўніцтва кампаніі, «ЦэнтарКурорт» наогул спыніў працу на ірацкім кірунку: «Як толькі стала зразумела, што некаторыя грамадзяне Іраку спрабуюць скарыстацца турыстычнымі каналамі для таго, каб незаконна трапіць у краіны ЭЗ, мы вырашылі выключыць усякія патэнцыйныя рызыкі і наогул спынілі прыём турыстаў з Іраку».
- З пачатку году беларуска-літоўскую мяжу перасеклі больш за 4,1 тысячы нерэгулярных мігрантаў.
- Незаконна перасекчы беларуска-польскую мяжу толькі за жнівень спрабавалі звыш 3000 разоў.
- Польскія і літоўскія ўлады сьцьвярджаюць, што абвастрэньне сытуацыі на мяжы зьвязана зь дзеяньнямі рэжыму Аляксандра Лукашэнкі, які «спрабуе дэстабілізаваць сытуацыю ў Польшчы і Літве».
- У ліпені Аляксандар Лукашэнка заявіў, што з прычыны санкцыяў Беларусь больш ня будзе стрымліваць нелегальную міграцыю ў краіны Эўразьвязу.
- Літва і Польшча заявілі пра пачатак будоўлі сьцяны на мяжы зь Беларусьсю.
