Пра гэта паведамляе DW са спасылкай на міністэрства абароны Вялікай Брытаніі. «У сваіх думках мы з сем’ямі сямёх афганскіх цывільных асобаў, трагічна загінулых у натоўпе ў Кабуле», — гаворыцца ў заяве міністэрства.
У заяве адзначаецца, што сытуацыя ў аэрапорце застаецца выключна складанай, але робіцца ўсё магчымае, каб ажыцьцяўляць эвакуацыю як мага больш бясьпечным шляхам.
Раней карэспандэнт брытанскай мэдыякампаніі Sky News, які знаходзіцца на месцы падзеяў, паведаміў, што перад брамай аэрапорту пачалася цісканіна сярод афганцаў, якія імкнуліся прарвацца ў зону вылету. Паводле яго, некалькі чалавек былі заціснутыя ў натоўпе. Карэспандэнт бачыў, як з натоўпу выносяць загорнутыя ў белае трупы. Салдаты і санітары спрабавалі аказаць дапамогу, але для некаторых дапамога прыйшла занадта позна, адзначыў ён.
Між тым заходнія краіны працягваюць эвакуацыю з Афганістану людзей, якія ратуюцца ад талібаў. Бундэсвэр позна ўвечары 21 жніўня паведаміў, што з Кабулу вывезена на самалётах больш за 2130 чалавек. Амэрыканскія войскі за тыдзень эвакуіравалі паветраным шляхам каля 17 тысяч чалавек.
