Расея правяла сэрыю хакерскіх нападаў на сайт Ваенна-марскіх сіл Украіны, заявіла Міністэрства абароны Ўкраіны 9 ліпеня. Паводле міністэрства, да інцыдэнтаў датычныя структуры Паўднёвай вайсковай акругі Узброеных сіл РФ, а таксама «кібэрпадразьдзяленьні цэнтральнага падпарадкаваньня» і органы расейскай выведкі.
«У выніку былі апублікаваныя некаторыя дакумэнты і ў асноўным фэйкавыя паведамленьні, зьвязаныя з вучэньнем „Sea Breeze-2021“, якое цяпер праходзіць у басэйне Чорнага мора», — гаворыцца ў паведамленьні Мінабароны. Ведамства падкрэсьлівае, што ніводзін з дакумэнтаў «ня быў атрыманы ў выніку ўцечкі інфармацыі з інфармацыйна-тэлекамунікацыйных сыстэм Узброеных сіл Украіны».
Сайт Ваенна-марскіх сіл Украіны часова спыніў працу з прычыны ўразьлівасьцяў праграмнай плятформы, але цяпер ён працуе.
Акрамя таго, Мінабароны Ўкраіны зафіксавала DDoS-напады супраць свайго афіцыйнага вэб-партал, аднак яны аказаліся «беспасьпяховымі», падкрэсьліў Кіеў.
«Праекты міжнароднага абароннага супрацоўніцтва і дапамогі Ўкраіне з боку краін-партнэраў традыцыйна выклікаюць неадэкватныя эмоцыі ў вайскова-палітычным кіраўніцтве Расейскай Фэдэрацыі. Ня сталі выключэньнем і сёлетнія міжнародныя вайсковыя вучэньні Sea Breeze-2021», — адзначылі ў Мінабароны.
Міжнародныя вайсковыя вучэньні Sea Breeze-2021 з удзелам 32 краінаў, у тым ліку ЗША і іншых чальцоў NATO, праходзяць у Чорным моры да 23 ліпеня. У іх задзейнічаныя 32 баявыя караблі, 40 самалётаў і 5000 вайскоўцаў з 17 краін-чальцоў Паўночнаатлянтычнага альянсу, а таксама яго партнэраў.
