У калёнцы Марына Золатава піша, што незалежнай Беларусі сёлета споўніцца 30 гадоў, і дзьве траціны гэтага часу «зафіксаваныя беларускім парталам Tut.by».
«Прызнаць яго экстрэмісцкім — значыць зьнішчыць 20-гадовы архіў беларускай гісторыі, зьнішчыць сам рэсурс і шматгадовую працу яго вялікай каманды. Пазбавіць трохмільённую аўдыторыю ўлюбёнай крыніцы інфармацыі. І ўсё гэта толькі таму, што рэдакцыйная палітыка Tut.by не задавальняе ўладу. Tut.by заклікаў да гвалтоўнай зьмены ўлады? Не. Да іншых гвалтоўных дзеяньняў? Таксама не. Абражаў сілавікоў або дзейную ўладу? Зноў міма. МУС у сваім пазове ў суд указвае, што ў публікацыях Tut.by вышэйшыя службовыя асобы характарызуюцца нэгатыўна. А дзеяньні ўлады можна ацэньваць толькі пазытыўна? Крытыкаваць нельга наогул? Гэта злачынства, экстрэмізм?»
Золатава адзначае, што рэдакцыя проста выконвала працу, якую мелі выконваць журналісты — фіксавалі падзеі, што адбываліся ў Беларусі.
Самай галоўнай каштоўнасьцю для рэдакцыі Tut.by Золатава назвала чалавечае жыцьцё.
«Мы супраць гвалту і ганеньняў любога з бакоў. Мы любім сваю краіну і хочам, каб людзі ў ёй жылі шчасьліва, каб маглі рэалізаваць свае таленты і забясьпечыць годнае жыцьцё сваім сем’ям. Толькі шчасьлівыя і свабодныя людзі, якія не адчуваюць страху і ставяцца адзін да аднаго з павагай, могуць зрабіць нашу краіну лепшай».
Галоўная рэдактарка заблякаванага парталу дадала, што ў свабоднай краіне марыў жыць і заснавальнік Tut.by Юры Зісэр.
Раней улады пазбавілі Tut.by статусу СМІ, а цяпер могуць прызнаць матэрыялы парталу «экстрэмісцкімі». 15 супрацоўнікаў рэдакцыі знаходзяцца за кратамі з-за падазрэньня ў крымінальнай справе. Сайт заблякаваны рашэньнем Міністэрства інфармацыі, аднак 8 ліпеня група супрацоўнікаў рэдакцыі абвясьціла аб стварэньні на базе Tut.by новага праекту, Zerkalo.io.
Пра перасьлед Tut.by
- 18 траўня офіс рэдакцыі быў заблякаваны за публікацыю «забароненай заканадаўствам інфармацыі», туды прыйшлі супрацоўнікі ДФР. Пазьней у ведамстве паведамілі, што на службовых асобаў завялі крымінальную справу за ўхіленьне ад выплаты падаткаў у асабліва буйным памеры. На думку сілавікоў, рэзыдэнт Парку высокіх тэхналёгій атрымаў выручку, не абумоўленую дзейнасьцю, дазволенай для рэзыдэнтаў.
- У справе затрымалі агулам 15 чалавек: кіраўнікі, журналісты і іншы пэрсанал мэдыйнага парталу Tut.by (Людміла Чэкіна, Марына Золатава, Вольга Лойка, Ірына Рыбалка, Алена Талкачова, Анжэла Асад, Марыя Новік, Ала Лапатка, Аляксандра Дайнека, Андрэй Аўдзееў, Дар'я Данілава, Кацярына Ткачэнка і Ірына Касьцючэнка), а таксама генэральны дырэктар Hoster.by Сяргей Павалішаў (вызвалілі 1 верасьня) і ўдава заснавальніка Tut.by Юлія Чарняўская. Праваабаронцы прызналі іх палітвязьнямі.
- Удава заснавальніка парталу Юрыя Зісера Юлія Чарняўская цяпер пад хатнім арыштам, два дні пасьля затрыманьня пра яе не было нічога вядома, яна перанесла гіпэртанічны крыз і была на нейкі час шпіталізаваная.
- Сам сайт Tut.by заблякаваны рашэньнем Мінінфармацыі.
- У сьнежні 2020 году Tut.by на патрабаваньне Міністэрства інфармацыі пазбавілі статусу СМІ. Падставай сталі раней вынесеныя папярэджаньні да матэрыялаў аб правядзеньні прэзыдэнцкіх выбараў, дзейнасьці Камітэту дзяржаўнага кантролю, беларускай мытні і г.д.
- Увечары 27 чэрвеня партал выдаліў з сацыяльных сетак усе допісы за апошнія паўтара года.
- 13 жніўня Суд Цэнтральнага раёну Менску прызнаў інфармацыйную прадукцыю і сацыяльныя сеткі Tut.by і новага праекту тутбаеўцаў Zerkalo.io экстрэмісцкімі.
- 7 кастрычніка Сьледчы камітэт паведаміў пра новую крымінальную справу супраць тутбаеўцаў — за распальваньне варожасьці, учыненае групай асобаў (ч. 3 арт. 130). Максымальная санкцыя па гэтым артыкуле — 12 гадоў зьняволеньня.
- Справу Tut.by пачалі разглядаць 9 студзеня 2023 ў Менскім гарадзкім судзе. Працэс праходзіў ў закрытым рэжыме, яго ўзначальвала судзьдзя — Валянціна Зянькевіч.
- На лаве падсудных знаходзіліся галоўная рэдактарка выданьня Марына Золатава, былая генэральная дырэктарка Людміла Чэкіна. Яшчэ тры фігуранткі справы, якім раней зьмянілі меру стрыманьня, – Вольга Лойка, Алена Талкачова і Кацярына Ткачэнка – на судзе не прысутнічалі, яны жывуць за мяжой.
- 17 сакавіка Марыне Золатавай і Людміле Чэкінай прысудзілі па 12 гадоў калёніі кожнай.
- 15 красавіка генэральны дырэктар Hoster.by Сяргей Павалішаў напісаў, што ўлады памілавалі дзевецярых фігурантаў справы пасьля пададзенага ў сьнежні прашэньня аб памілаваньні. Партал Zerkalo.io паведаміў, што мае інфармацыю аб тым, што агулам ад крымінальнай адказнасьці вызвалілі 9 чалавек.
