Эўразьвяз павінен даць Альбаніі і Паўночнай Македоніі магчымасьць рушыць наперад у напрамку перамоваў аб сяброўстве ў ЭЗ да кастрычніка гэтага году, гэта значыць да пачатку саміту ЭЗ, які арганізуе Славенія. Пра гэта, як паведамляе «Голас Амэрыкі», заявіў у аўторак Янэз Янша, кіраўнік ураду Славеніі, якая цяпер старшынюе ў Эўразьвязе.
Нягледзячы на тое, што і Альбанія, і Паўночная Македонія афіцыйна прызнаныя партнэрамі па перамовах аб уступленьні ў Зьвяз, прасоўваньне Паўночнай Македоніі ў гэтым кірунку заблякавала Баўгарыя, спасылаючыся на дыскусію пра агульнасьць македонскай і баўгарскай моваў.
Эўрапейскія краіны прытрымліваюцца розных думак у праблеме пашырэньня ЭЗ.
Некаторыя зь іх заклікаюць не сьпяшацца з прыёмам у Зьвяз новых дзяржаваў, спасылаючыся на карупцыю ў Румыніі і Баўгарыі, якія сталі чальцамі ЭЗ у 2007 годзе.
У гэтым кантэксьце ідзе гаворка і пра карупцыю ў Альбаніі, якая пакуль не спраўляецца з праблемай барацьбы з адмываньнем грошай.
У панядзелак канцлерка Нямеччыны Ангела Мэркель правяла нараду зь лідэрамі балканскіх дзяржаваў, імкнучыся надаць новы імпульс працэсу пашырэньня Зьвязу.
«У Эўропе існуе дылема: ці мае пашырэньне стратэгічнае значэньне, ці не. Мая думка палягае ў тым, што мае», — сказаў кіраўнік ураду Славеніі. Ён нагадаў, што ЭЗ зьменшыўся пасьля выхаду Вялікай Брытаніі і што ЭЗ ня дзейнічае ў сытуацыі, калі Расея імкнецца перашкодзіць Грузіі і Ўкраіне ўступіць у яго шэрагі.
Баўгарыя заяўляе, што Паўночная Македонія ня можа далучыцца да ЭЗ да таго часу, пакуль не пагодзіцца зь сьцьвярджэньнем баўгарскага боку, што македонская мова — не самастойная мова, а дыялект баўгарскай.
