1. Сьвята прымеркавалі да вызваленьня Менску ад нацыстаў 3 ліпеня 1944 году. Значная частка Беларусі на той час яшчэ заставалася пад нямецкай акупацыяй.
2. Тэрыторыю сучаснай Рэспублікі Беларусь канчаткова вызвалілі ад нацыстаў толькі 28 ліпеня 1944 году – у той дзень было вызваленае Берасьце.
3. Усю тэрыторыю БССР, якой яна была перад нападам нацысцкай Нямеччыны на Савецкі Саюз, вызвалілі толькі 24 студзеня 1945 году. У той дзень савецкія войскі ўзялі Кольна на Беласточчыне, якое са сьнежня 1939 году належала савецкай Беларусі. У верасьні 1944 году 3 раёны Берасьцейскай і 17 раёнаў Беластоцкай вобласьці былі перададзены ў склад Польшчы, а Беластоцкую вобласьць скасавалі.
4. Дзяржаўным сьвятам 3 ліпеня стала пасьля рэфэрэндуму 1996 году. Паводле афіцыйных вынікаў, выбарнікі прагаласавалі па ўсіх 7 пытаньнях таго рэфэрэндуму менавіта так, як заклікаў Аляксандар Лукашэнка — у тым ліку за тое, каб перанесьці Дзень Незалежнасьці.
5. Законна прызначанага старшыню ЦВК Віктара Ганчара перад тым рэфэрэндумам сілком вывелі з кабінэту супрацоўнікі службы аховы Лукашэнкі. Раней Ганчар заяўляў, што ня зможа прызнаць вынікаў рэфэрэндуму з прычыны шматлікіх парушэньняў. У 1999 годзе Ганчара разам зь ягоным сябрам Анатолем Красоўскім выкралі. Пазьней зьявіліся сьведчаньні, што да іх зьнікненьня магло быць датычнае кіраўніцтва краіны.
6. Да рэфэрэндуму Дзень Незалежнасьці афіцыйна адзначаўся 27 ліпеня – у гэты дзень у 1990-м Вярхоўны Савет БССР прыняў дэклярацыю аб дзяржаўным сувэрэнітэце Беларусі.
7. У Беларусі па круглых датах вайсковыя парады ладзяць 9 траўня (так было ў 1990, 1995, 2000, 2005, 2010, 2015 і 2020 гадах). У іншыя гады парад з удзелам Лукашэнкі праходзіў 3 ліпеня — так павялося з моманту пераносу сьвята з 27 ліпеня на дзень вызваленьня Менску. Выключэньнем стаў толькі 1999 год, калі ў цісканіне на прыступках пераходу станцыі мэтро «Няміга» загінулі 53 чалавекі. Сёлета параду ня будзе ўпершыню за 22 гады.
8. Падчас сьвяткаваньняў двойчы адбываліся трагічныя інцыдэнты. У 2008 годзе ўначы з 3 на 4 ліпеня на канцэрце каля стэлы «Менск — горад-герой» адбыўся выбух. Выбухнула самаробная прылада, начыненая мэталічнымі гайкамі і цьвікамі. Пацярпелі каля 50 чалавек, у тым ліку трое былі ў цяжкім стане.
9. Падазраванымі тады пабывалі 120 чалавек, шмат хто зь іх трапіў у сьледчыя ізалятары, але потым выявілася, што ніхто зь іх не датычны да арганізацыі выбуху. Адбіткі пальцаў узялі ў 1,3 мільёна чалавек. Пазьней суд прызнаў вінаватымі ў выбуху каля стэлы Ўладзіслава Кавалёва і Дзьмітрыя Канавалава — тых самых людзей, якім прысудзілі сьмяротнае пакараньне за выбух у менскім мэтро.
10. Падчас салюту 3 ліпеня 2019 году ў Менску адбыліся 4 выбухі снарадаў для фаервэрку. Ад раненьня аскепкамі загінула жанчына. Пацярпелі яшчэ 10 чалавек. Суд прызнаў вінаватымі камандзіра патрульнай роты Менскай вайсковай камэндатуры Аляксея Кругліка і двух супрацоўнікаў расейскай фірмы «Пиро-Росс», Максімільяна Сапронава і Канстанціна Дзянісава. Кожнага зь іх асудзілі на 3 гады пазбаўленьня волі ў калёніі-пасяленьні.
