З дапамогай ахвяраваньняў арганізацыя знайшла 20 тысяч рублёў за арэнду офісу. Аплаціць доўг самастойна арганізацыя не магла.
Як напісала ў Фэйсбуку старшыня таварыства, экс-дэпутатка Палаты прадстаўнікоў Алена Анісім, з дапамогай ахвяраваньняў, ТБМ разьлічылася з даўгамі.
Як патлумачыла раней Свабодзе Алена Анісім, пандэмія каранавірусу фактычна згарнула большую частку асьветніцкіх праектаў арганізацыі. Аднак палёгкі ад дзяржавы за аплату арэнды, нягледзячы на абяцаньні ўраду, так і не дачакаліся.
У выніку за мінулы год асноўны доўг перад арэндадаўцам (УП «Менскія гарадзкія інтэрнаты») дасягнуў 15 тысяч рублёў. Яшчэ 5 тысяч прырасло за кошт пені.
Спробы ТБМ знайсьці дадатковае фінансаваньне аказаліся бясплённымі — палітыка дзяржавы да роднай мовы палохае патэнцыйных спонсараў, кажа старшыня таварыства.
14 траўня сядзібу спрабавалі адключыць ад электрычнасьці, аднак пасьля размоваў зь непасрэднымі выканаўцамі ўдалося атрымаць адтэрміноўку.
