Будслаў наведалі старшыня Канфэрэнцыі каталіцкіх біскупаў у Беларусі Алег Буткевіч, арцыбіскуп Тадэвуш Кандрусевіч, біскупы Казімір Велікаселец, Юры Касабуцкі і Аляксандар Яшэўскі, паведамляе Catholic.by.
«Раніцай даведаўся і быў у шоку. Мы адразу зь біскупамі рушылі ў Будслаў. Пад’яжджаем да месца, зь якога адкрываецца від на касьцёл, і бачым, што даху ўжо няма, а над сьвятыняй падымаецца дым. Унутры сапраўднае возера. Я быў там. Дымка, вада...» — падзяліўся ўбачаным Тадэвуш Кандрусевіч.
Па словах арцыбіскупа, гэта вельмі вялікая трагедыя як для Каталіцкай царквы, так і для Беларусі, бо нацыянальны санктуарый у Будславе зьяўляецца гісторыка-культурнай каштоўнасьцю, а Будслаўскі фэст унесены UNESCO ў сьпіс нематэрыяльнай культурнай спадчыны чалавецтва.
«Бог прамаўляе да нас праз розныя падзеі, праз свае знакі. Сёньня наша краіна знаходзіцца ў вельмі вялікім крызісе. Ня толькі грамадзка-палітычным, а і маральным. Гэтае сумнае здарэньне — заклік Бога да таго, каб мы асэнсавалі сваё жыцьцё з пункту гледжаньня маральнага закону, духу Эвангельля, і стараліся ўпарадкаваць сваё жыцьцё праз малітву, пакаяньне, прабачэньне і імкненьне да міру ў нашым грамадзтве», — заявіў герарх.
«Калі згарэў Нотр-Дам у Парыжы, Францыя стала на калені. Перад абліччам будслаўскай трагедыі станем і мы на калені, перапросім Бога за нашыя асабістыя грахі і грахі нашага народу, паяднаемся адзін з адным. Мы розныя, але мы — адзін беларускі народ», — заявіў арцыбіскуп.
На яго перакананьне, адбудова санктуарыя і яго рэстаўрацыя мусяць стаць супольнай справай. Маці Божая Будслаўская заслугоўвае мець годнае месца, дзе беларускі народ і далей будзе яе ўшаноўваць, адзначыў ён.
Распачаты збор сродкаў на аднаўленьне пашкоджанай пажарам сьвятыні.
Ахвяраваньні праз сыстэму разьлікаў АРІП можна пералічыць на банкаўскі рахунак Дабрачыннага каталіцкага таварыства Caritas Менска-Магілёўскай Архідыяцэзіі. Падрабязнасьці па спасылцы.
