«Праз дабрачынную ўстанову яе кіраўніца Ш. выдзяляла фінансавае і іншае матэрыяльнае забесьпячэньне для ўдзельнікаў незаконных масавых мерапрыемстваў», — заявіла пінская пракуратура.
За гэта пагражае арышт або зьняволеньне да двух гадоў паводле 2-й часткі арт. 342.
23 сакавіка стала вядома, што ў Пінску ліквідуюць прыватную дабрачынную арганізацыю «Палеская дабрыня». Яе заснавальніца Алена Шымоліна падчас выбарчай кампаніі дапамагала ініцыятыўнай групе Сьвятланы Ціханоўскай і была назіральніцай на выбарах у Пінску.
Арганізацыя дапамагала дзецям з інваліднасьцю, малазабясьпечаным сем’ям, жанчынам, якія трапілі ў цяжкія жыцьцёвыя сытуацыі, а пасьля жнівеньскіх пратэстаў — і пацярпелым ад рэпрэсій.
15 кастрычніка Алену Шымоліну затрымалі за ўдзел у несанкцыянаванай акцыі 18 жніўня. На наступны дзень судзілі, прызналі вінаватай. Арыштаваць не маглі, бо ў яе непаўналетняе дзіця. Пакаралі штрафам у памеры 30 базавых велічынь — 810 рублёў. Праз два дні быў ператрус у яе дома і чатырохгадзінны допыт. Пасьля гэтага Шымоліна зьехала з 13-гадовай дачкой ва Ўкраіну, потым пераехала ў Польшчу, цяпер у Чэхіі.
Актывістка сьцьвярджае, што здолела вывезьці за мяжу доказы гвалту сілавікоў над пінчукамі і хоча прыцягнуць вінаватых да адказнасьці.
