Многія пачулі ў песьні палітычны падтэкст, у прыватнасьці крытыку пратэставага руху ў Беларусі.
11 сакавіка «Эўравізія» зьвярнуліся да Белтэлерадыёкампаніі (БТРК) з просьбай зьмяніць або замяніць песню, паколькі ў цяперашнім выглядзе яна «ставіць пад сумнеў непалітычны характар конкурсу». Кампазыцыю ўжо выдалілі з YouTube-каналу «Эўравізіі», дзе яна сабрала 6 тысяч лайкаў і каля 40 тысяч дызлайкаў.
У эфіры тэлеканалу «Настоящее время» лідэр «Галасоў ЗМеста» Дзьмітрый Бутакоў сказаў, што песьня не палітычная. Ірына Рамалійская паспрабавала высьветліць, які сэнс ён укладваў у кампазыцыю.
— Арганізатары конкурсу заяўляюць, што ваша песьня ставіць пад сумнеў апалітычны характар конкурсу. Падобна на тое, намякаюць, што трэба памяняць тэкст песьні. Гатовыя?
— Гэта ж ня мне паведамілі, гэта Эўрапейскі вяшчальны зьвяз і нашы тыя, хто нас адпраўляе, адпаведна, арганізацыя «Белтэлерадыёкампанія». Гэта яны вось так маюць зносіны паміж сабой. Я б усе гэтыя пытаньні пераадрасоўваў туды.
— Раскажыце, пра што тэкст гэтай песьні? Таму што трактовак шмат.
— Зноў жа, давайце мы дачакаемся ўсё ж такі нейкага канчатковага рашэньня, каб нам было ад чаго скакаць, тады я з задавальненьнем раскажу, які асабіста я закладваў сэнс у гэты тэкст. Ну што я ўвогуле не казаў пра палітыку ў ім — гэта, па-мойму, відавочна для любога чалавека, які чытаць умее ці хоць бы дае сабе рады задумацца над словамі.
— Але не відавочна. Чаму вы я хочаце расшыфраваць тэкст сваёй жа песьні?
— Таму што яшчэ ня прынята канчатковае рашэньне. Навошта? Гэта размовы на пустым месцы пакуль яшчэ.
— Добра. У вас пры гэтым ёсьць іншая песьня, «Евромечта»: «Чемодан, вокзал и заграница… Здравствуй, европейская мечта. Хочется коленями склониться и свободу лобызать в уста». Гэта такая іронія над каштоўнасьцямі Эўрапейскага зьвязу?
— А іранізаваць нельга над ім ці як?
— Не, я ні ў якім разе не кажу, што нельга. Я хачу вас пачуць і зразумець, які сэнс вы ўкладваеце ў гэтую песьню.
— Натуральна, гэта іронія, ды і ўсё.
— А чаго вы не хочаце гаварыць? Я проста не магу зразумець, вы асьцерагаецеся сказаць нешта лішняе?
— Не, яшчэ раз, я з вамі з задавальненьнем пабалбачу, але я зноў жа кажу, я проста не камэнтую «Эўравізію» і мне не хацелася б цяпер у дадзены момант.
— «Хочется и равенства, и братства, и повсюду волю изъявлять, в трепетном порыве толерантства на сыночка платье надевать». Ці правільна я разумею, што гэта іронія над свабодай ЛГБТ-супольнасьцяў?
— Давайце яшчэ раз, глядзіце, пункт першы. Я клятвенна абяцаю на гэтую тэму пагаварыць таксама, усё раскажу. Пакуль усе пытаньні на гэтую тэму і каля гэтай тэмы — да Белтэлерадыёкампаніі.
— Ну гэта ж не Беларуская тэлерадыёкампанія вешала дулю на сьцяг Эўразьвязу ў вашых кліпах, таму я менавіта вам гэта адрасую. Навошта вам наогул [удзельнічаць] у эўрапейскім конкурсе? Мне сапраўды хочацца зразумець ход думкі.
— І зноў жа я вам кажу, я з задавальненьнем вам пра гэта распавяду, толькі ледзь-ледзь пазьней, праз пару дзён.
— Пра палітыку. Уласна, вы ўзьніклі ў беларускай культуры…
— Пра палітыку я гаварыць ня буду цяпер. Пра палітыку магу сказаць толькі: што мы людзі ўвогуле апалітычныя зусім.
— А я вось хачу зразумець ваша стаўленьне да тых пратэстаў, да паводзін сілавікоў, да зьбіцьця мірных пратэстоўцаў, да таго, што адбывалася потым у ізалятарах, да таго, што ўлады рабілі са СМІ.
— Добра. Вось глядзіце: усё, што перавышае разумныя нейкія межы, усе мы не вітаем як з боку пратэстаў, так і з боку сілавікоў. Калі гэта нешта было, калі гэта ўсё даказана, калі гэта ўсё дакладна, усім правільна і зразумела, трэба з гэтым разьбірацца. А пакуль няма — балбатаць бессэнсоўна.
— Але песьні вы ня пішаце сатырычныя з нагоды паводзін, напрыклад, АМАПу ці Аляксандра Лукашэнкі. Ён наогул скарбніца такая для сатыры.
— Ёсьць. Калі ўважліва ў нас на канале паглядзіце песьні — ёсьць і пра ўладу, і пра чыноўнікаў ёсьць песьні, і пра астатняе ўсё.
— А пра Аляксандра Лукашэнку?
— Ёсьць.
— Сатырычная? Скіньце, я з задавальненьнем паслухаю. А што вы там высьмейваеце?
— Што значыць скіньце? Вы ж працуеце, вось вы будзьце ласкавая, паглядзіце, паслухайце. Там 40 штук гэтых.
