Лінкі ўнівэрсальнага доступу

 
Супраць аднаго зь лідэраў магілёўскіх пратэстаў на «хіміі» распачалі крымінальную справу. Яму пагражае зона

Супраць аднаго зь лідэраў магілёўскіх пратэстаў на «хіміі» распачалі крымінальную справу. Яму пагражае зона

абноўлена

Валадар Цурпанаў
Валадар Цурпанаў

Магілёўскага праваабаронцу і аднаго зь мясцовых лідэраў леташніх пратэстаў Валадара Цурпанава з папраўчай установы адкрытага тыпу («хіміі») этапавалі ў сьледчы ізалятар Магілёва. Пра гэта стала вядома ад жонкі Ірыны.

Пазьней Ірына даведалася ў дзяжурнай частцы Круглянскага РАУС, што муж знаходзіцца ў мясцовым ізалятары часовага ўтрыманьня да этапаваньня ў Магілёў. Калі тое адбудзецца, невядома.

Валадар Цурпанаў адбываў трохгадовае пакараньне на «хіміі» ў райцэнтры Круглае, што на Магілёўшчыне, за абразу судзьдзяў. 10 сакавіка ён паведаміў на сваёй старонцы ў Facebook, што супраць яго распачалі крымінальную справу. Актывіста азнаёмілі з пастановай аб гэтым, дзе адзначана, што яго падазраюць ва ўхіленьні ад адбыцьця пакараньня ва ўстанове адкрытага тыпу.

Паводле пастановы, асуджаны «дапусьціў шэраг парушэньняў парадку і ўмоваў адбыцьця пакараньня». Сярод іх згадваецца ляжаньне на ложку ў недазволены час і незапраўленае спальнае месца. Дзеяньні Цурпанава кваліфікаваныя як «прыкметы злачынства, прадугледжанага артыкулам 415 Крымінальнага кодэксу (ухіленьне ад адбываньня пакараньня ў выглядзе абмежаваньня волі). Санкцыя гэтага артыкула прадугледжвае пазбаўленьне волі да трох гадоў.

Раней Цурпанаў пісаў, што чакае этапаваньня ў сьледчы ізалятар Магілёва, дзе яго будуць трымаць да суду, які і мае вырашыць ягоны лёс.

Актывіст лічыць, што пасьля таго, як яго зрабілі «схільным да дэструктыўных дзеяньняў», паставіўшы на прафіляктычны ўлік, крымінальны перасьлед — лягічнае разьвіцьцё сытуацыі. На «хіміі» актывіст адмаўляецца выконваць патрабаваньні, якія, на ягоную думку, парушаюць чалавечы гонар і годнасьць. Свае дзеяньні ён называе «грамадзкім непадпарадкаваньнем».

«У маёй сытуацыі ў мяне засталося толькі захаваць сябе, ня здрадзіўшы сваім каштоўнасьцям, прынцыпам, справе», — тлумачыць ён.

Валадар Цурпанаў у апазыцыі з канца 1980-х гадоў. Ён кіраваў абласной арганізацыяй Партыі БНФ. У 1997-м галадаў 10 дзён у ізалятары. З галадоўкі выходзіў у лякарні. У жніўні 2020-га дамогся сустрэчы з кіраўнікамі гарадзкой і абласной выканаўчай улады, паведаміў ім патрабаваньні «вуліцы» ды пераконваў сустрэцца з пратэстоўцамі. Агулам за чатыры месяцы пратэстаў правёў у няволі 43 дні. 10 дзён трымаў сухую галадоўку, пратэстуючы супраць незаконнага зьняволеньня. Быў шпіталізаваны.

Ігар Лосік Кацярына Андрэева Ірына Слаўнікава Марына Золатава
XS
SM
MD
LG