Сястра Рамана Бандарэнкі Вольга Кучарэнка напісала ў «Інстаграме», што Генпракуратура працягвае праверку абставінаў сьмерці Рамана Бандарэнкі, які загінуў 12 лістапада.
У Генэральнай пракуратуры ёй адказалі, што пакуль падставаў для завядзеньня крымінальнай справы няма.
Паводле іх, над праверкай працуе шмат службоўцаў, яны апыталі сьведак выкраданьня і ўжо высьветлілі пра Бандарэнку:
- дзе ён вучыўся,
- у які садок хадзіў,
- якія стасункі ў яго былі зь людзьмі,
- ці бачыў яго нехта некалі пʼяным, буяным, незычлівым,
- якія ў яго былі шкодныя звычкі,
- які ўлюбёны алькагольны напой,
- ці ведаюць сваякі паролі ад ягоных гаджэтаў і гэтак далей.
Але на запыты і хадайніцтвы «Генэральная пракуратура дала кучу адмоваў», бо няма крымінальнай справы, таму маці Бандарэнкі не прызналі пацярпелай, і ёй «нельга ні з чым азнаёміцца».
«Няма ні дня, каб я ня думала пра яго. Амаль кожнае сваё дзеяньне суправаджаю думкамі пра Рому», — напісала Вольга Кучарэнка.
Увечары 12 студзеня сілавікі затрымалі людзей, якія выйшлі на акцыю памяць Рамана Бандарэнкі ў двары, вядомым як «плошча Пераменаў», недалёка ад якога ён жыў.
Што вядома пра сьмерць Рамана Бандарэнкі
- Невядомыя ў масках пачалі зразаць бел-чырвона-белыя стужкі ў двары на вуліцы Чарвякова ўвечары 11 лістапада.
- Пасьля вэрбальнага канфлікту зь мясцовымі жыхарамі невядомыя пачалі нападаць і біць жыхароў. Каля 22:16 некалькі чалавек забралі і зьвезьлі на бусах, падобных да тых, якімі карыстаюцца сілавікі.
- Паводле непацьверджанай інфармацыі, каля 1,5 гадзіны Бандарэнка знаходзіўся ў Цэнтральным РУУС Менску.
- У 0:05 Раман Бандарэнка паступіў у лякарню хуткай мэдычнай дапамогі зь вялікім ацёкам мозгу, закрытай чэрапна-мазгавой траўмай, субдуральнымі гематомамі, ударамі, абдзірынамі.
- Паводле лекараў, ён быў у затарможаным стане, але ў апэрацыйную яго ўжо прывезьлі ў коме. Апэрацыя цягнулася некалькі гадзін.
- Раман быў у крытычным стане.
- ГУУС Менгарвыканкаму сьцьвярджае, што міліцыя прыбыла на месца толькі пасьля здарэньня. Рамана знайшлі непрытомнага і выклікалі хуткую. Адзін са сьведак здарэньня расказаў Свабодзе, што міліцыя прыяжджала яшчэ тады, калі невядомыя зразалі стужкі, «аднак хутка зьехала, нічога не зрабіўшы».
- Сьледчы камітэт заявіў, што мужчына быў пʼяны. Аднак мэдыкі гэтую заяву абверглі — у крыві Бандарэнкі алькаголю не было.
- 19 лістапада затрымалі журналістку Tut.by Кацярыну Барысевіч і лекара Арцёма Сарокіна. Кацярына Барысевіч была аўтаркай артыкула, дзе гаварылася, што ў крыві загінулага Рамана Бандарэнкі не было алькаголю. Інфармацыю пра гэта ёй перадаў лекар Арцём Сарокін. Пачатак суду над імі прызначаны на 19 лютага.
- 18 лютага 2021 году, на соты дзень пасьля сьмерці Рамана, Генпракуратура паведаміла яго маці Алене Бандарэнцы, што па факце сьмерці яе сына пачалі крымінальную справу.
- 17 верасьня 2021 справу прыпынілі«з прычыны неўстанаўленьня асобы, якая падлягае прыцягненьню ў якасьці абвінавачанага».
