На панядзелак 11 студзеня прызначаны разгляд скаргі Ігара Лосіка на ўтрыманьне пад вартай.
Адміністратар тэлеграм-каналу «Беларусь галаўнога мозгу» і фрылансэр-кансультант беларускай службы «Радыё Свабода» Ігар Лосік знаходзіцца за кратамі 195 дзён. Яго галадоўка працягваецца ўжо 23 дні. Такім чынам Ігар пратэстуе супраць новых абвінавачваньняў у падрыхтоўцы да ўдзелу ў масавых беспарадках.
«Ігар працягвае галадоўку, спыняцца пакуль не зьбіраецца, — гаворыць адвакат. — Адчувае сябе больш-менш здавальняюча. Прынамсі, скаргаў не выказвае. Яго глядзіць лекар. Пытае ў яго, ці ўсё ў парадку. Ігар адказвае, што так. Мы сустракаемся двойчы на тыдзень. Сустрэча працягваецца прыкладна дзьве гадзіны. Ігар цікавіцца навінамі. Вядома, яго цікавіць, што адбываецца зь сям’ёй, што з дачкой, што ў жонкі новага, у бацькоў. Яго таксама вельмі цікавіць тое, што адбываецца ў Беларусі».
Па словах адваката, 5 студзеня Ігар атрымаў 60 лістоў. Ён стараецца на ўсе адказаць, моцна дзякуе за падтрымку тым, хто яму піша.
Ён перадаў віншаваньне з-за кратаў.
«Ўсіх праваслаўных віншую са сьветлым сьвятам Раства Хрыстова!
У навагоднія і калядныя сьвяты хочацца спадзявацца на лепшае. А таксама гэта самы лепшы час для таго, каб правесьці яго зь сямʼёй. Вельмі спадзяюся, што хутка і я змагу ўбачыць і абняць сваіх блізкіх, бо менавіта гэтага цяпер вельмі не хапае.
Вялікі дзякуй усім, хто падтрымлівае маю сямʼю. Я ведаю, што многія знайшлі час і магчымасьць павіншаваць Паўлінку з Новым годам і Днём нараджэньня. Дзякуй вам за гэта!
Самаадчуваньне ў мяне нармальнае, сіл яшчэ хапае. Адчуваю падтрымку тысяч неабыякавых беларусаў, што надае сіл і падтрымлівае, калі засумаваў. Так што ўсё працягваецца, хоць часам па начах і сьняцца баранавіцкія „лодачкі“! (хот-догі з баранавіцкай бутэрброднай „Лодачка“ — РС)», — напісаў Ігар Лосік.
У панядзелак 11 студзеня суд Партызанскага раёну будзе разглядаць скаргу Ігара Лосіка на працяг меры стрыманьня ў выглядзе заключэньня пад варту. Разгляд пройдзе ў закрытым паседжаньні.
Крымінальны перасьлед Ігара Лосіка
На журналіста Радыё Свабода і блогера Ігара Лосіка ў 2020 годзе завялі крымінальныя справы паводле ч. 1 арт. 342 Крымінальнага кодэксу («падрыхтоўка да парушэньня грамадзкага парадку») і ч. 2 арт. 293 («падрыхтоўка да ўдзелу ў масавых беспарадках»).
Лосіка затрымалі 25 чэрвеня 2020 году пасьля ператрусу дома ў Баранавічах. На ягоны тэлеграм-канал «РБ головного мозга» ў той момант былі падпісаныя 167 тысяч чалавек.
Ігар Лосік актыўна асьвятляў падзеі выбараў прэзыдэнта Беларусі. Праваабаронцы прызналі яго палітвязьнем.
15 сьнежня 2020 году, пасьля выстаўленьня другога абвінавачаньня, Ігар Лосік абвясьціў галадоўку пратэсту і трымаў яе да 25 студзеня 2021 году.
11 сакавіка 2021 году Лосіку выставілі новае абвінавачаньне. На знак пратэсту Ігар пашкодзіў сабе запясьце на вачах у адваката і сьледчага, а таксама абвясьціў сухую галадоўку. За гэта Лосіка зьмясьцілі ў карцар сьледчай турмы Жодзіна. Там ён прабыў пяць дзён, чатыры зь якіх трымаў сухую галадоўку.
- 14 сьнежня 2021 году ў будынку СІЗА-3 ў Гомлі судзьдзя Мікалай Доля прысудзіў Ігару Лосіку 15 гадоў зьняволеньня. Яго прызналі вінаватым паводле двух артыкулаў Крымінальнага кодэксу — «Распальваньне сацыяльнай варажнечы і непрыязі ў адносінах да прадстаўнікоў улады і праваахоўных органаў, учыненае групай асобаў» (ч.3 арт.130) і «Арганізацыя масавых беспарадкаў, якія суправаджаліся пагромамі падпаламі, зьнішчэньнем маёмасьці і ўзброеным супрацівам прадстаўнікам улады» (ч.1 ст.293).
- Жонку Ігара Лосіка Дар’ю пакаралі 2 гадамі зьняволеньня ў калёніі агульнага рэжыму (паводле арт. 361-4 Крымінальнага кодэксу, «Садзейнічаньне экстрэмісцкай дзейнасьці») за інтэрвію пра мужа, у якім яна, паводле абвінавачаньня, «пазыцыянавала сябе як жонка палітвязьня». Прысуд Дар’і Лосік вынес 19 студзеня 2023 году судзьдзя Берасьцейскага абласнога суду Мікалай Грыгаровіч.
