Гэта ніжэй, чым заяўленыя вынікі выпрабаваньняў амэрыканскіх РНК-вакцын Pfizer і Moderna і расейскай вэктарнай вакцыны «Спутник V». Усе тры гэтыя распрацоўнікі заявілі аб эфэктыўнасьці, вышэйшай за 90 адсоткаў. Аднак вынікі кітайскай вакцыны лепшыя, чым у брытанскага прэпарату карпарацыі AstraZeneca, які паказаў вынік ад 70 да 55 працэнтаў.
Вакцына «Сінафарм» адрозьніваецца па сваёй схеме дзеяньня ад іншых выведзеных на рынак прэпаратаў. Тыя працуюць на тэхналёгіях, якія раней не выкарыстоўваліся, кітайская ж грунтуецца на клясычнай схеме «інактываванай вакцыны».
Яна дастаўляе ў арганізм выгадаваныя ў лябараторыі фрагмэнты «забітага» каранавірусу, каб выклікаць імунную рэакцыю. Над такім тыпам вакцын ад каранавірусу працуюць адразу некалькі краін, у тым ліку Расея (другі этап выпрабаваньняў праводзіць Фэдэральны навуковы цэнтар імя Чумакова).
Пры гэтым навуковая супольнасьць мае пытаньні да празрыстасьці дасьледаваньняў кітайскіх прэпаратаў, адзначае The New York Times. У справаздачах кітайскіх навукоўцаў не хапае дадзеных. Напрыклад, «Сінафарм» не раскрывае, колькі пацыентаў удзельнічалі ў выпрабаваньні прэпарату і ці праявіліся ў іх сур’ёзныя пабочныя эфэкты. «Кітайскія распрацоўнікі падаюць нават менш інфармацыі, чым расейскія», — адзначае адзін з экспэртаў газэты.
Кітайскі ўрад, які кантралюе «Сінафарм», ужо зарэгістраваў прэпарат і ўпэўнены ў яго бясьпецы. Да сярэдзіны лютага, калі ў Кітаі сьвяткуецца ўсходні Новы год, улады краіны плянуюць вакцынаваць да 50 мільёнаў чалавек. Да канца наступнага году «Сінафарм» плянуе выпусьціць да мільярда дозаў прэпарата, гэтага павінна хапіць на вакцынацыю 500 мільёнаў чалавек. Вакцына кампаніі — адна зь пяці, якія распрацоўваюцца цяпер у Кітаі.
