Яму пагражае да 3 гадоў абмежаваньня волі. Справу разглядае судзьдзя Магілёўскага раённага суду Аляксандар Халадцоў.
Судзьдзя выдаліў Цурпанава з судовай залі праз слоўную перапалку зь ім. Але фармальную прычыну агучваць не пажадаў.
Пра Валадара Цурпанава:
- Працуе мантажнікам у прыватнай арганізацыі.
- Актывіст апазыцыі з канца 1980-х гадоў. Кіраваў абласной арганізацыяй Партыі БНФ. У 1997-м галадаў 10 дзён у ізалятары. З галадоўкі выходзіў у лякарні.
- У жніўні 2020-га дамогся сустрэчы з кіраўнікамі гарадзкой і абласной выканаўчай улады, давёў ім патрабаваньні «вуліцы» ды пераконваў сустрэцца з пратэстоўцамі.
- Першага верасьня прыйшоў на ўрачыстую лінейку ў 43-ю магілёўскую школу і заклікаў пэдагогаў, якія працавалі ва ўчастковых камісіях, пакаяцца за фальсыфікацыю выбараў. Яго затрымалі і асудзілі на 20 дзён адміністрацыйнага арышту.
- Агулам за чатыры месяцы пратэстаў правёў у няволі 43 дні.
- 10 дзён трымаў сухую галадоўку, пратэстуючы супраць незаконнага зьняволеньня. Быў шпіталізаваны.
Сьледзтва: «У непрыстойнай форме зьняважыў гонар і годнасьць судзьдзяў»
Паводле абвінавачаньня, Цурпанаў, «кіруючыся нізкімі намерамі, каб адпомсьціць за разгляд неправамернай, на ягоны погляд, справы аб адміністрацыйным правапарушэньні, сумысьля абразіў» судзьдзяў Вікторыю Палякову і Вольгу Краўчанку. Сьледзтва лічыць, што абвінавачаны рэзкім выказваньнем «у непрыстойнай форме» зьняважыў іхны гонар і годнасьць пры выкананьні службовых абавязкаў.
У абодвух выпадках актывіста судзілі ў рэжыме відэаканфэрэнцыі, бо ён быў пад арыштам у ізалятары часовага ўтрыманьня. Пасьля фразаў, якія сталі падставай для крымінальнага перасьледу, яго пазбаўлялі ўдзелу ў працэсах за непавагу да суду, а адзін раз яшчэ і аштрафавалі.
Судова-лінгвістычная экспэртыза адзначыла, што выказваньне Цурпанава «ўтрымлівае адмоўную ацэнку чалавека і можа зьневажаць гонар і годнасьць асобы, калі зьмест фразы не адпавядае рэчаіснасьці».
Чаму Цурпанава судзьдзя выдаліў з залі
Цурпанаў адмовіўся адказваць на пытаньні суду, якімі вызначалася ягоная асоба. Сваю пазыцыю актывіст патлумачыў тым, што такія зьвесткі ёсьць у матэрыялах справы. Пасьля спрэчкі судзьдзя заявіў, што ў прысутнасьці Цурпанава ня будзе разглядаць справу, і сышоў з залі. Праз паўгадзіны аднавіў працэс без падсуднага. Чаму пазбавіў абвінавачанага права ўдзельнічаць у працэсе, не сказаў. Цурпанаў жа, заходзячы ў залю пасьля перапынкаў, настойваў, каб гэтыя прычыны былі названыя. Актывіста спрабавалі вывесьці з залі міліцыянты з Дэпартамэнту аховы. Урэшце судзьдзя абвясьціў перапынак да 24 сьнежня.
Журналістам Цурпанаў патлумачыў свае паводзіны тым, што судзьдзя непаважліва зьвяртаўся да яго як удзельніка працэсу і грамадзяніна. Акрамя таго, не гаварыў зь ім па-беларуску. Ад удзелу ў працэсе, тым ня менш, актывіст не адмаўляецца, бо рыхтаваўся да яго.
Цурпанаў: «Не магу прызнаваць тое, чаго няма»
Валадар Цурпанаў пра абвінавачаньне кажа, што «ня можа прызнаць тое, чаго няма». Пра рэзкія фразы, выказаныя ў адрас судзьдзяў, не шкадуе. Ён лічыць, што ў ягоных дзеяньнях няма складу інкрымінаванага яму злачынства, але яго ўсё роўна пакараюць, бо ён вядомая ў горадзе асоба. Думае, прысудзяць «сама меней 1 год «хіміі».
Цурпанаў кажа, што падчас сьледзтва даваць паказаньні адмовіўся, бо не хацеў «дапамагаць сыстэме абцяжарваць лёс людзей, якія вымушаныя быць саўдзельнікамі крымінальных злачынстваў крамлёўскай хунты».
