У Гомлі зноў «затрыманьні бяз акцыі»
У Гомлі людзі хадзілі па вуліцы Савецкай, і іх адвольна затрымліваў АМАП. Жыхарка вуліцы Працоўнай, што ў цэнтры гораду, стала сьведкай, як АМАП гнаўся за групай маладых людзей. Аднаго зь іх яны павалілі на зямлю, скруцілі.
Каля вуліцы Камунараў міліцыя затрымала дзьвюх жанчын зь бел-чырвона-белымі парасонамі.
На вуліцы Жаркоўскага затрымалі грамадзкага актывіста Валера Сьляпухіна. Цяпер у Цэнтральным РАУС — ня менш як 7 затрыманых.
Менск: калёна рушыла ў бок цэнтру
Калёна рушыць па Партызанскім праспэкце ў бок цэнтру. Які далей маршрут, невядома.
У раёне дому нумар 87 па Партызанскім праспэкце здарыўся такі выпадак. За калёнай ехалі амапаўцы ў бусах, спыніліся і выйшлі, каб затрымліваць пратэстоўцаў. Людзі натоўпам пайшлі ў іх бок, сілавікі заскочылі ў машыны і зьехалі. Гэта выклікала хваляваньне ў калёне.
За мостам на скрыжаваньні з вуліцай Пляханава ізноў кардон сілавікоў з аўтамабіляў. Цяпер аўтамабілі разьяжджаюцца. Пратэстоўцы вырашаюць, куды рушыць далей.
Менск: закрылі некалькі станцый мэтро
У Менску закрылі станцыі мэтро «Трактарны завод», «Партызанская» і «Аўтазаводзкая», па-ранейшаму закрытыя «Пралетарская» і «Першамайская».
Таксама застаюцца закрытымі «Пралетарская» і «Першамайская». Затое адкрылі «Кастрычніцкую/Купалаўскую» і «Нямігу».
Менск: супраць пратэстоўцаў ужылі сьвятлашумавую гранату, чуваць гукі стрэлаў
На Партызанскім праспэкце ў раёне ўнівэрмагу «Беларусь» супраць пратэстоўцаў была выкарыстаная сьвятлашумавая граната. Каля гатэля «Турыст» чуваць гукі стрэлаў.
Пад гатэлем «Турыст» стаяць тры мікрааўтобусы з амапаўцамі ў чорнай форме. Яны са зброяй і стралялі (магчыма, у паветра). Вакол іх сабраліся пратэстоўцы.
Мяркуючы па здымках Onliner.by, сілавікі стралялі ў бок пратэстоўцаў з стрэльбаў. Баявымі ці халастымі, невядома. Але пра пацярпелых пакуль не паведамлялі. На кадрах «Белсату» бачныя снарады-хлапушкі, слабейшыя за сьвятлошумавыя гранаты.
Горадня: пратэстоўцы гуляюць па Савецкай
Пратэстоўцы працягваюць хадзіць туды-сюды па Савецкай вуліцы. За імі назірае шмат міліцыянтаў, пакуль нікога не чапаюць.
Берасьце: каля сотні чалавек ідуць маршам па горадзе
Менск: пратэстоўцы дайшлі да кардону сілавікоў і разьвярнуліся назад
Сілавікі перакрылі праспэкт у бок выезду з гораду, не пускаюць людзей да «Аўтазаводзкай».
Галава калёны наблізілася да кардону сілавікоў, які стаяць за скрыжаваньнем з вуліцай Куляшова. У ім 3 вадамёты, аўтазакі, сыстэма «Рубеж», сілавікі са шчытамі. Большасьць пратэстоўцаў, дайшоўшы да кардону, разварочваецца і ідзе назад.
Менск: калёна дайшла да ўнівэрмагу «Беларусь», сілавікі перакрылі рух, стаіць вадамёт
Пратэстоўцы дайшлі да ўнівэрмагу «Беларусь». Сілавікі праз гукаўзмацняльнік папярэджваюць, што акцыя несанкцыянаваная. Людзі часта крычаць «Глядзі ў вакно, а не ў тэлевізар».
Тым часам сілавікі перакрылі рух каля дому па адрасе Партызанскі праспэкт, 86, і паставілі вадамёт проста на газон.
У раёне «Аўтазаводзкай» з боку Кабушкіна вельмі шмат сілавікоў у вайсковай форме без апазнавальных знакаў. За ўнівэрмагам «Беларусь» таксама шмат сілавікоў.
Менск: затрыманьні ля Мотавелазаводу, на Куляшова — шмат аўтазакаў
Тым часам насупраць Мотавелазаводу ідуць затрыманьні. Каля 10 бусаў ездзяць па Партызанскім праспэкце і пэрыядычна хапаюць людзей.
Менск: на Партызанскім — яшчэ адна калёна пратэстоўцаў
На Партызанскім праспэкце заўважылі яшчэ адну калёну пратэстоўцаў. Паводле «Нашай Нівы», яна спрабуе дагнаць асноўную.
Гомель: сілавікі сталі ў ланцуг і не даюць людзям прайсьці
Менск: пачаліся затрыманьні
Толькі што адбыліся затрыманьні каля ГЦ «Ленінград». Таксама «Наша Ніва» паведамляе пра хапун на скрыжаваньні Партызанскага праспэкту і вуліцы Кашавога, людзі разьбягаюцца па дварах.
Менск: У калёне пратэстоўцаў – лідэр незалежнага працоўнага руху Генадзь Быкаў
У калёне пратэстоўцаў журналісты заўважылі аднаго са старых лідэраў незалежнага працоўнага руху Генадзя Быкава. Ён сказаў, што сёньня адмыслова выйшаў на акцыю, абураны заявай сілавікоў пра тое, што яны будуць ужываць зброю супраць людзей. У 90-я Быкаў быў удзельнікам шматлікіх акцый рабочых. Пазьней узначальваў Свабодны прафсаюз.
У Наваградку затрымалі каля 10 чалавек
Каля 60 жыхароў Наваградку сабраліся на цэнтральнай плошчы. Спачатку міліцыянты затрымлівалі пратэстоўцаў па адным. Каля 15:10 на плошчу прыехалі паўсотні сілавікоў, іх начальнік скамандаваў затрымліваць усіх. Людзі разьбегліся, прыкладна 5 чалавек яшчэ затрымалі.
Гомель: людзі гуляюць з кветкамі, затрымалі дваіх жанчын
На вуліцы Савецкай у Гомлі затрымалі дзьвюх жанчын, якія гулялі пад бел-чырвона-белымі парасонамі. Людзі ходзяць па Савецкай групамі, з кветкамі і букетамі з восеньскага лісьця. На ўсіх скрыжаваньнях стаяць міліцыянты, АМАП.
У Віцебску — «ланцуг салідарнасьці». Ёсьць затрыманыя
Горадня: сілавікі перакрываюць турнікетамі цэнтральную вуліцу
На Савецкай вуліцы дзяўчына пачала жангляваць, людзі скандуюць «Жыве Беларусь» і пляскаюць у ладкі.
Сілавікі ў чорнай форме і шаломах перакрываюць Савецкую турнікетамі. Міліцыянты папярэджваюць людзей, што за несанкцыянаваныя мерапрыемствы пагражае адказнасьць.
Менск: у бок Партызанскага праспэкту едзе калёна вайсковай тэхнікі
У бок Партызанскага праспэкту па вуліцы Казлова паехала калёна вайсковай тэхнікі.
Тым часам галава калёны дайшла да скрыжаваньня з вуліцай Кашавога. Тут да яе далучаюцца калёны зь іншых раёнаў. Час ад часу галава калёны спыняецца, каб пачакаць іншых. Шмат людзей сталага веку. Шмат сьцягоў раёнаў — Уручча, Сухарава, Серабранка і іншыя. Журналісты адзначаюць, што многія людзі ў масках, каб засьцерагчыся ад каранавірусу.
На сёньняшнім маршы ў пратэстоўцаў новая крычалка — «Ультыматум!».
Менск. Дэманстранты занялі праспэкт
Калёна пратэстоўцаў заняла праезную частку ля «МотаВелаЗавода» і скандуе «Забастоўка». Наперад на вуліцы Куляшова сілавікоў столькі, што нібы яны сабраліся на парад. Колькасць дэманстрантаў рэпарцёры «Наша нівы» ацэньваюць у дзясяткі тысяч чалавек.