Працягваюцца затрыманьні на Якуба Коласа
Як паведамляе карэспандэнт тэлеканалу «Белсат», на вуліцы Якуба Коласа цяпер затрымліваюць жанчын. Нікога з журналістаў тут няма.
Вядомыя прозьвішчы 356 затрыманых на Жаночым маршы ў Менску. Сьпіс абнаўляецца
Праваабарончы цэнтар «Вясна» вядзе сьпіс затрыманых падчас сёньняшняга Жаночага маршу ў Менску. Сьпіс пастаянна абнаўляецца і дапаўняецца, у ім ужо 356 прозьвішчаў.
Расея назвала запрашэньне Ціханоўскай у Брусэль «умяшаньнем ва ўнутраныя справы Беларусі»
У расейскім зьнешнепалітычным ведамстве асудзілі намер Эўразьвязу запрасіць на пасяджэньне Рады ЭЗ Сьвятлану Ціханоўскую, паведамляе Інтэрфакс. «Падлашчваньне эўразьвязаўскіх міністраў замежных справаў да самаабвешчанай прадстаўніцы беларускай апазыцыі і запрашэньне яе ў Брусэль „для камунікацыі“ — складнік сцэнару ўмяшаньня ўва ўнутраныя справы Беларусі», — заявіла афіцыйная прадстаўніца МЗС РФ Марыя Захарава. Цалкам чытайце тут.
Праваабаронцу «Вясны» Марфу Рабкову перавялі ў менскае СІЗА на Валадарскага
Каардынатарку Валянтэрскай службы «Вясны» Марфу Рабкову перавялі ў сьледчы ізалятар № 1 на вуліцы Валадарскага ў Менску, паведаміў «Вясьне» яе муж Вадзім Жаромскі. Яе затрымалі ўвечары 17 верасьня ў Менску ў межах крымінальнай справы па ч. 3 арт. 293 Крымінальнага кодэксу (Навучаньне ці іншая падрыхтоўка асоб для ўдзелу ў масавых беспарадках, альбо фінансаваньне такой дзейнасьці). Затрыманьне праводзілі супрацоўнікі Галоўнага ўпраўленьня па барацьбе з арганізаванай злачыннасьцю.
Кіпр зноў заблякаваў санкцыі Эўразьвязу адносна Беларусі
Кіпр зноў заблякаваў санкцыі Эўразьвязу адносна Менску. Прадстаўнік Нікасіі наклаў вэта на праект штрафных захадаў у пятніцу, 18 верасьня, на пасяджэньні Камітэту сталых прадстаўнікоў краін ЭЗ (Coreper) у Брусэлі, паведамляе «Нямецкая хваля».
«Такі крок Нікасіі абараняе рэжым Лукашэнкі ад наступстваў яго недэмакратычных і рэпрэсіўных дзеяньняў», — цытуе агенцтва DPA эўрапейскага дыплямата, які пажадаў застацца неназваным.
У той жа час Кіпр тлумачыць сваё супрацьдзеяньне санкцыям адносна Беларусі тым, што імкнецца дамагчыся ўвядзеньня санкцыяў ЭЗ супраць Турэччыны, якая вядзе выведку газу ў спрэчных водах усходняй часткі Міжземнага мора.
«Нахабнае ўмяшаньне ва ўнутраныя справы». МЗС пра ўдзел Ціханоўскай у сустрэчы міністраў замежных спраў Эўразьвязу
Прэс-сакратар МЗС Беларусі Анатоль Глаз пракамэнтаваў агенцтву БелТА, як афіцыйны Менск ацэньвае інфармацыю пра заплянаваны на 21 верасьня ўдзел кандыдаткі ў прэзыдэнты Сьвятланы Ціханоўскай у паседжаньні Рады міністраў замежных спраў Эўразьвязу.
«Гэта магло б быць сьмешна і кур’ёзна, каб не было так сумна. Відавочна, што такія дзеяньні зьяўляюцца нахабным і непрыкрытым умяшаньнем ува ўнутраныя справы нашай краіны і поўнай непавагай да яе грамадзянаў, — заявіў Глаз. — Навошта наагул праводзіць выбары, калі можна прызначыць звонку зручнага ўва ўсіх адносінах суб’екта і рабіць выгляд, што выбудоўваеш зь ім дачыненьні? Пасьля такіх крокаў ужо нікому ня трэба даводзіць, што рэалізуецца курс на падрыў сувэрэнітэту Беларусі».
Як затрымлівалі Ніну Багінскую. Відэа
Падчас сёньняшняга Жаночага маршу сілавікі затрымалі 73-гадовую актывістку Ніну Багінскую, яе завялі ў аўтазак і зьвезьлі разам з астатнімі затрыманымі. Пазьней стала вядома, што Ніну Багінскую высадзілі з аўтазака каля Савецкага РАУС.
«Ланцуг салідарнасьці» ва Ўруччы
Затрымліваюць удзельнікаў «ланцуга салідарнасьці» на Сурганава
Удзельнікаў ланцуга салідарнасьці на Сурганава таксама затрымліваюць. Ужо затрымалі некалькі чалавек.
Затрыманы таксама журналіст у сіняй камізэльцы «Прэса», паведамляе «Еўрарадыё».
Ланцуг салідарнасьці насупраць месца разгону Жаночага маршу
На вуліцы Сурганава, насупраць месца, дзе быў разагнаны Жаночы марш, стаіць ланцуг салідарнасьці. У ім каля 100 чалавек зь бел-чырвона-белымі сьцягамі.
Жаночы марш скончыўся масавымі затрыманьнямі
Запоўненыя аўтазакі і мікрааўтобусы пакідаюць месца разгону. Людзі крычаць: «Ганьба!». Тут яшчэ застаюцца журналісты. Стаіць машына хуткай дапамогі.
Жаночы марш у Менску 19 верасьня скончыўся масавымі затрыманьнямі. Затрыманыя сотні чалавек.
Як вядома Свабодзе, сярод затрыманых — рэклямістка Юлія Ляшкевіч, а таксама дырэктарка «Арт-Карпарэйшн» Анжаліка Крашэўская, арганізатар фэстываляў «ТэАрт» і «Лістапад», паведаміў у Фэйсбуку рэжысэр Андрэй Курэйчык.
Таксама затрымалі нейкага мужчыну, які ўсё шэсьце здымаў калёну на мабільны тэлефон, а пасьля, калі пачаліся затрыманьні, крычаў: «Так ім і трэба, фашыстам. Малайцы хлопцы, затрымлівайце іх!» У яго на куртцы расейскія сьцягі.
«Бліскучы марш» у Менску. ФОТА
«Бліскучы марш» у Менску скончыўся масавымі затрыманьнямі жанчын. ШМАТ ФОТА
Затрыманьні працягваюцца, прыехала «хуткая дапамога»
На месца разгону прыехалі дзьве машыны хуткай дапамогі. Лекары дапамагаюць жанчынам, якія страцілі прытомнасьць.
Адна з жанчын ляжыць на асфальце, вакол яе дактары і АМАП. Сілавікі заносяць жанчыну ў машыну хуткай дапамогі.
Затрыманьні працягваюцца бесьперапынку. Сілавікі невялікімі групамі забіраюць жанчын са счэпак і вядуць у аўтазакі.
Падчас Жаночага маршу затрыманая актывістка Вольга Гарбунова. Раней яна шмат гадоў кіравала прытулкам для жанчын «Радаслава».
Жанчына страціла прытомнасьць на Жаночым маршы
Жанчын па адной выцягваюць са счэпкі і заводзяць у аўтазак. Частцы жанчын, хто быў у галаве калёны, удалося сысьці раней. Каля аўтазакаў утварыліся вялізныя чэргі.
Адна жанчына, якая стаяла ў счэпцы, страціла прытомнасьць, яна проста ляжыць на асфальце на ходніках. Яе атачылі амапаўцы, дапамогу ёй не надаюць. Сілавікі кажуць, што выклікалі «хуткую дапамогу». Падбегла жанчына, крычыць, што гэта яе сястра і ў яе эпілепсія. Яна просіць, каб ёй аддалі сястру, але сілавікі яе не падпускаюць.
Празь некаторы час жанчына, якая ляжала на ходніках, апрытомнела і сышла разам са сваёй сястрой.
На вуліцы Якуба Коласа, куды сышла частка ўдзельніц Маршу, таксама былі затрыманьні.
АМАП: «Усе будуць затрыманыя. Прапаную прайсьці самастойна»
Пляцоўка перад гандлёвым цэнтрам «Айсбэрг» фактычна зачышчаная сілавікамі.
Яшчэ каля сотні жанчын стаяць у счэпцы побач, абкружаныя АМАПам і сілавікамі ў зялёнай форме і балаклавах, і сьпяваюць «Купалінку». Сілавікі адганяюць журналістаў «на 50 мэтраў».
Затрымліваюць літаральна ўсіх — гэта сотні чалавек.
Каля сотні жанчын, якія заблякаваныя сілавікамі ў счэпцы, крычаць: «Дайце нам сысьці». «Усе будуць затрыманыя, — кажа супрацоўнік АМАП. — Прапаную прайсьці самастойна».
На Жаночым маршы пачаліся затрыманьні. Затрымалі і Ніну Багінскую
Калі ўдзельніцы маршу рухаліся па вуліцы Сурганава, яны заўважылі аўтазакі на суседняй вуліцы і сталі ў счэпкі. Хутка да калёны пад'ехалі і аўтобусы, зь якіх выйшлі сілавікі ў балаклавах.
Каля гандлёвага цэнтру «Айсбэрг» пачаліся затрыманьні, перадае наш карэспандэнт. Шмат сілавікоў у балаклавах, яны абкружылі групу ўдзельніц Маршу. Заблякаваныя сілавікамі жанчыны стаяць у счэпцы і гучна крычаць.
Каля цэнтру «НЛО» сілавікі пачалі затрымліваць жанчын. Жанчыны скандуюць: «Дайце нам сысьці!». Супраць адной дзяўчыны амапавец выкарыстаў здушальны прыём.
Затрымалі і актывістку Ніну Багінскую, яе зацягнулі ў шэры аўтазак 1204.
Сілавікі пры затрыманьнях прымяняюць фізычную сілу. Вырываюць жанчын са счэпак, тых, хто ўпіраецца, цягнуць па асфальце. Ужо дзясяткі затрыманых.
На Жаночым маршы зьявіліся сілавікі. Дзяўчаты адбілі матацыклістаў ад АМАПу
На паркоўцы перад ГЦ «Эўропа» пачаліся затрыманьні. Спачатку сталі затрымліваць матацыклістаў – дзяўчыну і хлопца. Падбеглі журналісты. Удзельніцы маршу абкружылі людзей у цывільным. Зьявіліся людзі ў балаклавах, мікрааўтобусы.
Жанчыны сталі ў счэпку перад шэрагам сілавікоў, каб абараніць матацыклістаў ад затрыманьня. Яны адыходзяць бліжэй да будынкаў, далей ад сілавікоў і працягваюць рух.
Выглядае, што матацыклісты не затрыманыя. Сілавікі таксама пакінулі месца канфлікту.
Жаночы марш: калёна скандуе «Дзякуй журналістам»
Калёна жанчын скандуе «Дзякуй журналістам». Затрыманьняў няма, калёна праходзіць плошчу Бангалор.
Насупраць парка Дружбы народаў зьявілася калёна байкераў зь бел-чырвона-белымі сьцягамі. Іх вітаюць удзельніцы маршу.
Жаночы марш павярнуў на вуліцу Сурганава і рухаецца ў бок унівэрсама «Рыга». Тым часам калёну байкераў спыніла ДАІ.