Ватыкан: Уладам Беларусі патрэбная стрыманасьць
Пратэстоўцы ў Беларусі павінны выказваць свае патрабаваньні мірна, а ўлады — прыслухоўвацца да грамадзян і паводзіць сябе стрымана, заявіў прадстаўнік Ватыкану архібіскуп Іван Юрковіч сёньня ў Жэнэве, паведамляе Інтэрфакс.
«У пошуках мірнага вырашэньня гэтага крызісу Сьвяты Пасад лічыць неабходным, каб дэманстранты выказалі свае патрабаваньні мірна. Уладам таксама неабходна праяўляць стрыманасьць, прыслухоўвацца да голасу сваіх грамадзян, заставацца адкрытымі іх справядлівым чаканьням, гарантуючы поўную павагу іх грамадзянскіх правоў і правоў чалавека», — сказаў ватыканскі дыплямат.
Архібіскуп Юрковіч адзначыў, што для зьняцьця напружанасьці ў краіне неабходны «шчыры дыялёг, адмаўленьне гвалту, шанаваньне справядлівасьці і правоў».
Беларускі фонд спартыўнай салідарнасьці: «Намесьнік міністра спорту заняўся запалохваньнем спартоўцоў
Беларускі фонд спартыўнай салідарнасьці (BSSF/Belarusian Sport Solidarity Foundation) апублікаваў у Фэйсбуку зварот да спартоўцаў, у якім сьцьвярджае, што намесьнік міністра спорту Міхаіл Партны «заняўся запалохваньнем спартоўцаў»: што ён прызначае ім сустрэчы або «прыходзіць без папярэджаньня ў кампаніі 2-3 амбалаў», пагражае, намякае на фізычную расправу над спартоўцамі і іх сем’ямі.
Фонд заклікае спартоўцаў пазьбягаць усялякіх зносін з Партным, не пагаджацца на сустрэчы, а калі ён засьпеў іх зьнянацку — адразу тэлефанаваць сябрам, блізкім ці знаёмым журналістам.
«Нэўтральная пазыцыя — гэта ўжо не пазыцыя». Студэнты МДЛУ запісалі зварот да адміністрацыі
«Мы лічым, што адміністрацыя ўнівэрсытэту ня мае права захоўваць маўклівы нэўтралітэт. Бо, як сказалі нашы выкладчыкі, нэўтральная пазыцыя — гэта ўжо не пазыцыя», — гаворыцца ў звароце.
У ім студэнты патрабуюць ад адміністрацыі лінгвістычнага ўнівэрсытэту:
- публічна заявіць аб сваёй пазыцыі ў дачыненьні да вынікаў выбараў і выказацца пра гвалт з боку сілавікоў,
- арганізаваць новыя выбары ў студэнцкае прадстаўніцтва, каб забясьпечыць рэальнае самакіраваньне,
- гарантаваць бясьпеку студэнтаў і выкладчыкаў у сьценах і на тэрыторыі ўнівэрсытэту,
- даць студэнтам законную і бясьпечную пляцоўку для выказваньня сваіх думак на тэрыторыі ўнівэрсытэту.
Вось такія СМС-паведамленьні атрымалі некаторыя менчукі падчас сёньняшняга Жаночага маршу. Некаторыя пішуць, што атрымалі падобнае паведамленьне яшчэ ўчора.
Вечаровы «ланцуг салідарнасьці» ў Менску
Кіраўнік незалежнага прафсаюзу на «Белшыне» тыдзень галадаў у ізалятары
56-гадовы Сяргей Гурло больш за 34 гады працуе вульканізатарнікам шын. 19 верасьня ён выйшаў з бабруйскага ізалятара.Ён расказаў, што супрацоўнікі вязьніцы кпілі зь ягонага пратэсту і палітычных прыхільнасьцяў. Даймалі пытаньнямі, чаму «ягоная прэзыдэнтка Ціханоўская выступае за ўвядзеньне санкцыяў супраць беларускага народу». Пры гэтым яму несвоечасова аказвалі мэдычную дапамогу. Цалкам чытайце тут.
У Менску затрымалі музыку Аляксандра Памідорава
Аляксандра Памідорава затрымалі ўвечары — пасьля дваровага сьвята ў Шабанах. Паліттэхноляг Ільля Дабратвор зьняў відэа, на якім музыку вядуць у аўтазак, паведамляе «Эўрарадыё».
У Кіеве прайшла акцыя, прымеркаваная да дня беларускай сымболікі
У цэнтры ўкраінскай сталіцы на майдане Незалежнасьці беларусы і ўкраінцы адзначылі дзень беларускай сымболікі. У акцыі ўдзельнічалі і тыя грамадзяне Беларусі, якія былі вымушаныя зьехаць ва Ўкраіну ў пошуках бясьпекі.
Актывісты трымалі бел-чырвона-белыя сьцягі, а потым удзельнікі акцыі выстраіліся на пляцоўцы такім чынам, каб з паветра можна было прачытаць слова «Жыве!», і разгарнулі вялікі бел-чырвона-белы сьцяг. Увесь час яны скандавалі: «Пакуль мы адзіныя, нас не перамагчы», «Верым, можам, пераможам», «Жыве Беларусь».
Адна з арганізатарак акцыі — тэатральная акторка, лідэрка рок-гурту NAKA Анастасія Шпакоўская, якая зьехала зь Беларусі разам зь дзецьмі, сказала Свабодзе: «Сёньня сьвята нашага сапраўднага сьцяга і сапраўднай сымболікі. Гэтым флэшмобам і ролікам, які мы зробім, хочам падтрымаць нашых беларусаў, якія знаходзяцца цяпер у вельмі жорсткіх і жахлівых умовах»
«Гандызм у вас ня пройдзе». Расейскі экспэрт пра «пэсымістычны прагноз для Беларусі». ВІДЭА
«Стратэгія мірнага пратэсту сур’ёзна дыскрэдытаваная ў Менску, а параза беларускай рэвалюцыі робіць яе падзеяй сусьветнага маштабу», — лічыць доктар палітычных навук і выкладчык Лёнданскай школы эканомікі Ўладзімір Пастухоў.
У расейскай «Новой газете» ён апублікаваў вялікі артыкул зь вельмі пэсымістычным прагнозам для Беларусі. У інтэрвію Дзьмітрыю Гурневічу ён тлумачыць, што беларусы робяць ня так, і як трэба — так.
Менск: акцыя «Вецер пераменаў» у Зялёным Лузе
Дваровы канцэрт у менскай Сьляпянцы
Пачалі выпускаць першых затрыманых падчас Жаночага маршу
З Кастрычніцкага РУУС Менску выпускаюць першых затрыманых на Жаночым маршы. Валянціна Андрэева выйшла з РУУС, сказала, што адмовілася сьведчыць супраць сябе. На яе склалі пратакол, узялі адбіткі пальцаў. Па яе словах, ставіліся ветліва.
Як прайшоў «бліскучы марш», які разагналі сілавікі ў масках. Відэа
Сярод затрыманых на Жаночым маршы — Аляксандра Гушча, якая страціла твар і кісьці рук у пажары
Аляксандра выжыла ў страшным пажары ва ўзросьце 11 месяцаў. З таго часу яна стала прыкладам мужнасьці для многіх і гераіняй шматлікіх публікацый у СМІ.
Немаўляткам Аляксандра пацярпела так цяжка, што засталася бязь кісьцяў абедзьвюх рук, моцна пашкоджаны яе твар. Дзякуючы клопату маці ёй зрабілі шмат складаных апэрацый, у тым ліку ў ЗША. Паводле апошняй інфармацыі, Аляксандра працуе ў сфэры ІТ, жыве вельмі актыўным жыцьцём.
Чытачы Радыё Свабода пазналі Аляксандру Гушчу на фатаздымках з Жаночага маршу. Паводле інфармацыі праваабарончага цэнтру «Вясна», Аляксандра затрыманая.
Адну з затрыманых дзяўчат з РУУС забрала «хуткая»
Tut.by паведамляе, што з Савецкага РУУС адну з затрыманых дзяўчат павезьлі на «хуткай». Да машыны яна ішла сама. Паводле яе, адзін з затрыманых – грамадзянін Італіі.
Зь Ленінскага жа РУУС выйшаў супрацоўнік і сказаў прысутным, што затрыманых адпусьцяць на працягу трох гадзін.
Латушка: У Польшчы і Літве знаходзіцца каля 800 уцекачоў зь Беларусі
У Польшчы (Бяла-Падляска, Варшава, Кракаў, Лодзь, Познань) знаходзяцца, па розных ацэнках, каля 500 беларускіх уцекачоў, у Літве, па зьвестках арганізацыі «Дапамога», — каля 300, паведаміў у Тэлеграме сябра прэзыдыюму Каардынацыйнай рады па ўрэгуляваньні палітычнага крызісу Павал Латушка, які ў 2002-2008 гадах быў амабсадарам Беларусі ў Польшчы.
Канцэрт J:МОРС у менскай «Пясочніцы» раптоўна адмянілі
За гадзіну да заплянаванага канцэрту гурту J:МОРС адміністрацыя менскай пляцоўкі «Пясочніца» заявіла, што выступу ня будзе.
«Сябры. На жаль, з тэхнічных прычынаў вымушаныя паведаміць пра скасаваньне канцэрту J:МОРС. Прыносім прабачэньні і спадзяемся на разуменьне», — гаворыцца ў паведамленьні на Інстаграм.
Пазьней стала вядома, што сарваны канцэрт J:Морс пройдзе онлайн. Жывую трансьляцыю абяцаюць запусьціць тут.
Паводле Onliner.by, канцэрт «скасавалі» супрацоўнікі МНС «праз каранавірус»
Дэпутатка Менскага гарсавету заявіла, што складае свае паўнамоцтвы на знак пратэсту. Але яе «не адпусьцілі»
Дэпутатка Менскага гарадзкога савету па Дзяржынскай выбарчай акрузе № 23 Вольга Цесакова просіць адклікаць яе празь немагчымасьць дапамагчы пацярпелым ад дзеяньняў сілавікоў. У відэазвароце на тэлеграм-канале «Мая краіна Беларусь» яна патлумачыла, чаму Менскі гарсавет адмаўляе ёй у законным жаданьні скласьці паўнамоцтвы.
«З прычыны таго, што адбываецца ў краіне, я месяц таму напісала заяву аб датэрміновым складаньні паўнамоцтваў. Але гэтага аказалася недастаткова. У рамках беларускага заканадаўства, якое дзейнічае толькі ў неабходных для гэтага сытуацыях, дэпутат можа датэрмінова скласьці паўнамоцтвы ў выпадку хваробы, паводле рашэньня суду ў крымінальнай справе або шляхам адкліканьня, ініцыяванага выбарнікамі», — адзначыла Вольга Цесакова. Цалкам чытайце тут.